Bul tapsyrmany Qazaqstan Prezıdenti Qasym-Jomart Toqaev berdi.
Qazaqstan TJM qutqarýshylarynyń taǵy bir borty joıqyn jer silkinisiniń saldaryn joıýǵa kómek kórsetý úshin Túrkıaǵa ushady, dep habarlaıdy Almaty-akshamy.kz.
TJM baspasóz qyzmetiniń málimdeýinshe, bul tapsyrmany Qazaqstan Prezıdenti Qasym-Jomart Toqaev berdi.
"Ekinshi eshelon quramynda jeke quramnan 60 adam, olardyń ishinde TJM qutqarýshylary, Apattar medısınasy ortalyǵynyń dárigerleri, kınologıalyq esepteri bar", - delingen QR TJM baspasóz qyzmeti taratqan aqparatta.
TJM jedel áreket etý kúshterinde apattan qutqarý quraldary men jabdyqtardyń 150-ge jýyq jáne dári-dármekterdiń 160-tan astam túri bar.
Jer silkinisiniń saldaryn joıý jónindegi ortalyq shtabpen kelise otyryp, Qazaqstan TJM ekinshi toby Gazıantep qalasyndaǵy izdestirý-qutqarý jumystaryna qosylady. Túrkıaǵa tartylǵan qazaqstandyq qutqarýshylardyń jalpy sany 100 adam boldy.
TJ mınıstri Iýrıı Ilın qutqarýshylardy jóneltýdiń aldynda nusqaýlyq ótkizdi. Ol qutqarýshylarǵa adamdardy izdeý jáne qutqarý boıynsha jaýapty mindetter júktelgenin, sondaı-aq Túrkıa azamattarynyń jer silkinisiniń saldarymen tezirek kúresý múmkindigine degen úmitin atap ótip, qutqarýshylarǵa týystary men jaqyndary arasyna aman-esen oralýyn tiledi.
"Túrkıaǵa jiberilgen qazaqstandyq qutqarýshylar tájirıbeli mamandar, olardyń azamattardy qutqarýda jáne ártúrli tótenshe jaǵdaılardy joıýda praktıkalyq daǵdylary mol", – dep atap ótti TJM baspasóz qyzmeti.