Qar kóshkini júrýi múmkin.
Kúnniń buzylýyna baılanysty Tótenshe jaǵdaılar departamentiniń ókilderi turǵyndarǵa taýǵa shyqpaýǵa keńes berdi, dep habarlaıdy Almaty-alshamy.kz.
«15-17 aqpan kúni jylymyqtyń áserinen jáne qar jamylǵysynyń turaqsyz bolýyna baılanysty Úlken jáne Kishi Almaty sý alabynda qar kóshkini júrýi múmkin. Qıyn jaǵdaıǵa urynbas úshin, taý bókterine shyǵýǵa tyıym salynady. Taýda abaı bolyńyzdar», - dep eskertedi Almaty qalalyq TJD baspasóz qyzmeti.
Osyǵan baılanysty TJD Almaty turǵyndary men qonaqtaryna mynadaı qaýipsizdik sharalaryn nazarda ustaýdy usynady:
- Qatty jaýyn-shashyn ( qar, jańbyr) nemese qatty daýyl týraly eskertý jarıalanǵan jaǵdaıda, taýly aımaqqa barýdy keıinge qaldyrǵan durys;
- Eger siz kishigirim topyraq kóshkinderin baıqasańyz, onda taýǵa barmaǵanyńyz jón. Qarqyndy jaýyn-shashyn túsken jaǵdaıda tómen taýly aımaqta topyraq kóshkini bolýy múmkin;
- Eger siz taýda bolsańyz, muqıat bolyńyz jáne aýa raıynyń ózgerýin qadaǵalańyz;
- Eger siz taý bókterinde qardyń jyljýyn, qardyń túıirshikterin baıqasańyz, onda taýǵa barmaǵanyńyz jón, bul qardyń turaqsyz kúıde ekenin, kóshkin qaýpi bar ekenin bildiredi;
- Úıge tym kesh qaıtyp júrmeńiz, keri baǵytty taba almaýyńyz múmkin;
- Rúkzaktarda mynalar bolýy tıis: jyly kıimder, kútpegen jaǵdaıda dárigerge deıingi kómek kórsetýge arnalǵan dári qobdıshasy, GPS navıgatorlarynyń bolýy artyq etpeıdi;
- Eshbir jaǵdaıda taýǵa jalǵyz barmańyz;
- Týǵan-týystaryńyz ben jaqyndaryńyzǵa baratyn jerińizdi aıtyp ketińiz.