Prezıdenttik saılaý 12 naýryzǵa belgilengen.
Túrkimenstannyń qazirgi Memleket basshysy Gýrbangýly Berdimuhamedovtiń uly, Túrkimenstan Premer-Mınıstriniń orynbasary Serdar Berdimuhamedov 12 naýryzda ótetin saılaýda Túrkimenstan prezıdenttigine kandıdat retinde usynyldy, dep habarlaıdy Almaty-akshamy.kz Interfax.ru silteme jasap.
Onyń kandıdatýrasyn Túrkimenstan Demokratıalyq partıasy kezekten tys toǵyzynshy quryltaıy barysynda usynǵan.
«Búgin Túrkimenstannyń qoǵamdyq uıymdar ortalyǵynda Túrkimenstan demokratıalyq partıasynyń kezekten tys IX sezi ótti. Kún tártibine sáıkes, Túrkimenstan Mınıstrler kabıneti tóraǵasynyń orynbasary Serdar Gýrbangýlyevıch Berdimuhamedovtiń kandıdatýrasy usynyldy», - delingen habarlamada.
Aqpannyń 11-i kúni Túrkimenstannyń Halyq maslahaty (Halyq keńesi) otyrysynda 15 jyl prezıdent bolǵan Gýrbangýly Berdimuhamedov jas basshyǵa óz qyzmetin tapsyrýǵa nıeti ekeni týraly málimdep, Halyq maslahatynda (Parlamenttiń joǵarǵy palatasy) tek tóraǵalyq mindetin qaldyratynyn aıtqan bolatyn.
Túrkimenstanda merziminen buryn prezıdent saılaýy 2022 jyldyń 12 naýryzyna belgilengen. Túrkimenstan Konstıtýsıasyna sáıkes, Túrkimenstanda týylǵan, jasy 40-tan kishi emes, memlekettik tildi jetik meńgergen, osy elde sońǵy 15 jyl turaqty turatyn jáne jumys isteıtin azamat el prezıdenti bolyp saılana alady.
Dúısenbi kúni Saılaý jáne referendýmdardy ótkizý jónindegi ortalyq komısıa (OSK) saılaý naýqany bastalǵanyn habarlady. Atap aıtqanda, 14 aqpannan bastap saıası partıalar men azamattardyń bastamashyl toptary joǵary memlekettik laýazymǵa óz kandıdattaryn usyný boıynsha jıyndar ótkize bastaıdy.
Qazir Túrkimenstanda vıse-premer qyzmetin 2021 jyldyń shildesinen beri qarjy-ekonomıkalyq keshenge jetekshilik etip kelgen Prezıdenttiń uly Serdar Berdimuhamedov atqarýda. 2021 jyly 22 qyrkúıekte ol 40 jasqa toldy.
2019 jyldyń 17 maýsymynan bastap Prezıdenttiń uly Túrkimenstannyń ortalyq aımaǵy – Ahal velaıatynyń (oblysy) basshysy bolyp tabylady. Serdar Berdimuhamedov 2020 jyldyń 7 aqpanynan bastap Indýstrıa jáne qurylys óndirisi mınıstri qyzmetin atqardy.
2021 jyldyń 11 aqpanynda ol Premer-Mınıstrdiń orynbasary, Joǵarǵy baqylaý palatasynyń tóraǵasy bolyp taǵaıyndalyp, Memlekettik qaýipsizdik keńesine tanystyryldy. Bul qyzmette ol memlekettik basqarý júıesinde, qarjy-ekonomıkalyq jáne áleýmettik sektorda sıfrlandyrý men ınovasıalyq tehnologıalardy engizýge de jaýapty boldy.