Onyń nesıe mólsherlemesi 0-den 5 paıyzǵa deıingi aralyqta bolýǵa tıis.
Halyqty turǵyn úımen qamtamasyz etý úshin úkimet qoljetimdi ıpotekalyq baǵdarlama daıyndaý kerek, dep habarlaıdy Almaty-akshamy.kz
Óıtpegen jaǵdaıda baspana máselesi ýshyǵyp, aldaǵy 7-8 jylda úıge muqtajdar sany 10 mıllıon adamǵa deıin artýy yqtımal. Bul týraly Qazaqstan Qurylysshylar Odaǵy uıymdastyrǵan jıynda aıtyldy.
Odaq ókilderi úkimet qurylys salasyn qarjylandyrý qajet dep sanaıdy. Sodan keıin elimizde ıpotekalyq baǵdarlamany júzege asyrý úshin qurylys materıaldary óndirisin damytý kerek. Iaǵnı, oǵan da joba jasap, qarjy bólgen jón. Sebebi qurylys materıaldarynyń basym bóligi shetelden keledi. Qazaqstanda sońǵy 20 jyl boıy páter baǵasy jyl saıyn kem degende 10-20 paıyzǵa qymbattaıdy.
«Eger qazirden bastap, Úkimet qurylys salasyn damytýǵa qatysty tıisti sharalar qabyldamasa bul úrdis toqtamaıdy», - deıdi jıynǵa qatysýshylar.
Aıta keteri, Birikken Ulttan uıymynyń standartyna sáıkes, bir adamǵa baspana kem degende 30 sharshy metrden kelýge tıis, al Qazaqstanda bul kórsetkish 23 sharshy metrge teń.
«Jumysshylar, tas qalaıtyndar, aǵash óńdeıtinder, óndiriste isteıtinder kezekke tura almaıdy. Nege ondaı aıyrmashylyq bar? Bir azamattyń quqyǵy basqa azamattan artyq pa? Bul ádiletsizdik dep sanaımyn. Sondyqtan bizdiń naryqqa ıpoteka kerek», - deıdi «Qazaqstan qurylysshylar odaǵy» RZTB tóralqa tóraǵasy Talǵat Erǵalıev.