Jalpy, jyl basynan beri 11 myńnan astam qazaq qandas mártebesin aldy.
Qazaqstan Úkimeti tarıhı otanyna oralǵysy kelgen qazaqtarǵa jańa algorıtm boıynsha vıza bere bastady, dep habarlaıdy Almaty-akshamy.kz.
«Qazaqstan aýmaǵynda qandastardy tıimdi qonystandyrý maqsatynda QR Eńbek jáne halyqty áleýmettik qorǵaý mınıstrligi memlekettik organdarmen birlesip, respýblıkaǵa vızalyq rejımdegi elderden kelgen qandastardy qabyldaý, qonystandyrý jáne beıimdeý boıynsha ortalyq jáne jergilikti memlekettik organdardyń ózara is-qımylynyń qadamdyq algorıtmin ázirledi.Bıylǵy 1 qyrkúıektegi jaǵdaı boıynsha, osy algorıtmge sáıkes, Túrikmenstannan kelgen 741 etnıkalyq qazaqqa turaqty turý úshin naqty óńirdi kórsete otyryp, tıisti vızalar berildi», - delingen Eńbekmıni baspasóz qyzmetiniń habarlamasynda.
Búgingi kúni Túrkimenstannan kelgen 666 etnıkalyq qazaq joǵaryda kórsetilgen vızalar negizinde memlekettik shekaradan ótti, onyń ishinde 59 adam Pavlodar oblysyna keldi, 162 adam jumys kúshi tapshy basqa óńirlerge qonys aýdarýǵa kelisti, 45 adam Mańǵystaý oblysyna qonystandyrý úshin ótinish berdi (negizdemeleri bar). Qalǵan etnıkalyq qazaqtar boıynsha jumys kúshi tapshy óńirlerge qonystandyrý jumystary júrgizilýde.
2022 jylǵy 1 qyrkúıektegi jaǵdaı boıynsha, 11 165 etnıkalyq qazaq tarıhı otanyna oralyp, qandas mártebesin aldy. 1991 jyldan bastap respýblıkaǵa barlyǵy 1 mln 99,1 myń etnıkalyq qazaq oraldy.
Osy jyldyń basynan bastap Qazaqstanǵa kelgen qandastardyń jartysynan astamy (69,6%) Ózbekstannan, 10,5% – QHR-dan, 7,1% – Túrkimenstannan, 4,6% – Mońǵolıadan jáne 8,3% - basqa elderden.
Kelgen etnıkalyq qazaqtar negizinen Almaty (30,8%), Mańǵystaý (17,2%), Túrkistan (9,4%) jáne Jambyl (6,8%) oblystarynda, sondaı-aq Almaty (5,9%), Nur-Sultan (7,5%) jáne Shymkent (7,6%) qalalarynda qonystandy.
Osy jylǵy 1 qyrkúıektegi jaǵdaı boıynsha, eńbekke qabiletti jastaǵy etnıkalyq qonys aýdarýshylardyń sany 59,5%-dy, eńbekke qabiletti jastan kishi adamdar 27,1%-dy jáne zeınetkerler 13,4%-dy quraıdy.
Eńbekke qabiletti jastaǵy qandastardyń bilim deńgeıi boıynsha 12,3%-y joǵary bilimdi, 38,9%-y arnaıy orta bilimdi, 47%- y jalpy orta bilimdi jáne 1,7%-nyń bilimi joq.
Esterińizge sala keteıik, qandastar men qonys aýdarýshylardy qabyldaýdyń óńirlik kvotasyna engizgen kezde etnıkalyq qazaqtar sýbsıdıa túrinde memlekettik qoldaýdyń mynadaı sharalaryn alýǵa quqyly:
- otbasynyń árbir múshesine kóshýge 70 AEK mólsherinde birjolǵy tólem (2022 jyly – 222,6 myń teńge);
- turǵyn úıdi jaldaý jáne komýnaldyq qyzmetterge aqy tóleý shyǵyndaryn jabý úshin tólem 1 jyl ishinde aı saıyn tólenedi. Tólem mólsheri qalaǵa qonys aýdarǵan bir adam úshin 20 AEK-ten (61,3 myń teńge) otbasy músheleriniń sany bes jáne odan da bolsa 30 AEK-ke (91,9 myń teńge) deıin, aýyldyq jerge qonys aýdarǵan bir adam úshin – 15 AEK-ten (45,9 myń teńge) otbasy músheleriniń sany bes nemese odan da kóp bolsa 21 AEK-ke (64,3 myń teńge) deıingi mólsherdi quraıdy.