Bıyl shildede dáýlesker kúıshi, kompozıtor Qurmanǵazy Saǵyrbaıuly týraly múltfılm jaryq kórmek.
Atalǵan týyndyny daıyndap jatqan mamandar arasynda qazirgi tańda jastarǵa anıme stılindegi sýretterimen tanymal L.Gýmılev atyndaǵy EUÝ-niń stýdenti Arýjan Unarbekova da bar.
Arýjan Unarbekova Eýrazıa ulttyq ýnıversıtetindegi sáýlet-qurylys fakúltetiniń 5 kýrsynda oqıdy. Ol oqýdan bos ýaqytynda túrli keıipkerlerdiń sýretin anıme stılinde salýmen aınalysady. Onyń el Prezıdentiniń beınesin atalǵan stılde salýy, sondaı-aq qazaq halqynyń kórnekti tarıhı tulǵalaryn sýrettegen jumystary jastar arasynda asa tanymal. Búginde ol sýret salýmen qatar, múltfılm jasaý isine de den qoıǵan, dep habarlaıdy Almaty-akshamy.kz QazAqparatqa silteme jasap.
«Qazir «Tasqyn» anımasıalyq stýdıasynda jumys isteımin. Bizdiń jobamyzdy mýltserıal dep atasa da bolady. Jalpy, mýltserıalymyz qazaq halqynyń ataqty kúıshileri, olardyń ómirbaıany jáne shyǵarmashylyq joly týraly baıandaıdy. Ár maýsymda jańa kúıshiler týraly aıtylady. Týyndynyń negizgi erekshelikteri - epızodtyń ishindegi kórsetiletin shaǵyn ángimelerdiń barlyǵy shynaıy kúılerdiń tarıhyna negizdelgen», - dedi Arýjan.
Qurmanǵazy týraly múltfılm 13 serıadan turady. Arýjan Unarbekovanyń sózinshe, týyndydaǵy basty keıipkerdiń obrazy birneshe aıǵa sozylǵan irikteýden keıin tańdalǵan.
«Múltfılmdegi keıipkerlerdiń qozǵalys anımasıasy asa qıyn bolmaǵandyqtan, biz olardyń sýretin detaldi kórsetip, realızım tásilin qoldanyp jatyrmyz. Qurmanǵazynyń týyndydaǵy obrazy birneshe aı boıy tańdaldy. Basty keıipkerlerdi jasaǵan sýretshiler Qurmanǵazynyń referensterin jınap, úlgilerdiń ishinen eń qolaılysyn tańdap aldy. Epızodtardyń uzaqtyǵy ártúrli. Máselen, bir epızod 20 mınýttan assa, sonǵylary 15-10 mınýtpen shekteledi. 2023 jyldyń shildesine deıin múltfılmniń birinshi maýsymy boıynsha jumystar aıaqtalyp, kórermenge jol tartady», - dep toqtaldy jas sýretshi.
Sonymen qosa, Arýjan Unarbekova ózge de jobalar boıynsha jumys jasap jatqanyn atap ótti.
«Kóptegen qyzyqty jobalardy shyǵarý josparlanýda. Qysqametrajdy fılmder men «Dala Sharqaýy» mýltserıalynyń ekinshi sezonynan basqa, tolyqmetrajdy kórkemfılmderdiń sújetteri daıyndalýda», - dep josparlarymen bólisti ol.
Eske sala keteıik, buǵan deıin QazAqparat redaksıasy Arýjannyń Memleket basshysy Qasym-Jomart Toqaevtyń beınesin anıme stılinde salǵan sýretteri týraly jazǵan edi.