Azaptaý úshin sottalǵandarǵa shartty túrde merziminen buryn bosatý sharasy áser etpeıdi.
Shartty túrde merziminen buryn bosatý azaptaý isteri boıynsha sottalǵandarǵa áser etpeıdi. Mundaı ózgeris «Ashyq» NQA portalynda jarıalanǵan QR «QR keıbir zańnamalyq aktilerine Qylmystyq, Qylmystyq-prosestik jáne Qylmystyq-atqarý kodeksterin ońtaılandyrý máseleleri boıynsha ózgerister men tolyqtyrýlar engizý týraly» zań jobasynda jazylǵan, dep habarlaıdy Almaty-akshamy.kz QazAqparatqa silteme jasap.
Atap aıtqanda, usynylyp otyrǵan ózgeristerdiń ishinde shartty túrde merziminen buryn bosatý qoldanylmaıtyn sanattar tizimin tolyqtyrylǵan.
«Qylmystyq kodekstiń 73-babyna (Jazanyń ótelmegen bóligin neǵurlym jeńil jaza túrimen aýystyrý nemese taǵaıyndalǵan jaza merzimin qysqartý) sáıkes bas bostandyǵynan aıyrý túrindegi jazasy bas bostandyǵyn shekteýmen aýstyrylǵan, buryn ómir boıyna bas bostandyǵynan aıyrý jazasyn óteýden shartty túrde bosatylǵandar, ómir boıyna bas bostandyǵynan aıyrý jazasyn óteý kezeńinde jańa aýyr nemese asa aýyr qylmys jasaǵandar men azaptaý úshin sottalǵandarǵa shartty túrde merziminen buryn bosatý sharasy áser etpeıdi», - delingen qujatta.
Toqtala ketsek, qazirgi qoldanystaǵy zańda mundaı talaptar joq. Sonymen qatar, ózgeristerdiń biri – shartty túrde merziminen buryn bosap shyqqandarǵa probasıalyq baqylaý taǵaıyndaý. Iaǵnı, sottalǵandar tıisti sheshimmen bostandyqqa shyǵatyn bolsa, onda olarǵa jazasynyń ótelmeı qalǵan merzimi úshin probasıalyq baqylaý bekitiledi. Máselen, ómir boıyna bas bostandyǵynan aıyrý jazasyna kesilip, shartty túrde merziminen buryn bosatylǵan azamatqa probasıalyq baqylaý 10 jyl merzimge belgilenedi.