Almaty-akshamy.kz saıtynda búgin jaryq kórgen jańalyqtarǵa sholý – kún kerýeni
Prezıdent Darhan Jazyqbaıdy qabyldady
Memleket basshysy Memlekettik qyzmet isteri agenttiginiń tóraǵasyn qabyldady. Darhan Jazyqbaı agenttiktiń byltyrǵy atqarǵan jumysynyń esebi men aldaǵy kezeńge arnalǵan josparyn tanystyrdy. Prezıdent servıstik jáne adamdarǵa beıimdelgen memlekettik apparatty qalyptastyrý, memlekettik qyzmetshilerdiń kásibı biliktiligin arttyrý jáne memlekettik qyzmet júıesine zamanaýı tehnologıalardy engizý isin jalǵastyrýdy tapsyrdy.
Almatylyq oqýshylar shetelge joldama aldy
Jarys qorytyndysy boıynsha №124 mekteptiń «Team 124» komandasy «Winning Alliance 2nd pick» jáne «THINK AWARD 2st place» nomınasıasyn jáne Londonda ótetin halyqaralyq «UK first championship 2024» jarysyna qatysýǵa joldama, al №206 mektep-gımnazıasynyń oqýshysy Ońǵarbek Tomırıs AQSH-tyń Húston qalasynda ótetin «2024 FIRST Championship, Houston» jarysyna qatysýǵa sertıfıkat jeńip aldy. Almaty qalasynyń namysyn qorǵaǵan oqýshylar birneshe júldeli oryndarǵa ıe boldy.
Almatydaǵy aıryqsha kórme
Kórmeniń bir bóliginde jasandy ıntellekt kózimen beınelengen Qazaqstan sýretteledi. Almaty ortalyq kórme zaly jáne Plan V galereıasynyń qyzmetkerleri uıymdastyryp jatqan kórmede neırojeli arqyly jasalǵan 120 jumys túri kórsetiledi. Joba qonaqtary elimizdiń tabıǵatyn, sáýleti men ulttyq asqanasynyń balama kórinisterin tamashalaı alady.
Izraıl atyspaıdy
Izraıl Ramazan aıynda Gaza sektoryna shabýyl jasaýdy toqtatýǵa kelisti. AQSH prezıdenti Djo Baıden Amerıkanyń "En-bı-sı" telearnasyna bergen suhbatynda málimdedi. Jáne de ol ymyranyń kelesi aptada kúshine enetinine úmit bildirdi. Ýaqytsha bitim qabyldanatyn bolsa, taraptar eń aldymen tutqyn almasýy múmkin. Sonymen qatar, hamastyqtar atysty doǵarý jaıly pátýaǵa Gazaǵa gýmanıtarlyq kómek kirgizý máselesin qosýdy talap etip otyr.
Qurannyń qudireti
Groznyı soty 2023 jyly 4 mamyrda Quran kitabyn órtegen Volgograd turǵyny Nıkıta Jýravelge úkim shyǵardy. Ol endi jazasyn jalpy rejımdegi túrmede óteıtin bolady. Tass agenttiginiń málimetine súıensek, ol sot úkimin tyńdaǵannan keıin barsha musylmannan keshirim surap, sot úkimin ádil dep sanaıtynyn málimdegen. Buǵan deıin ol Islam dinin qabyldaǵysy keletinin aıtqan. Tipti, Quran oqyp alǵashqy qadamdaryn jasap júrgenin jetkizipti.
Jetimniń aqysyn jegen
Sot oryndaýshysyna qatysty QR QK 251-baby (Jeke sot oryndaýshysynyń ókilettikterin teris paıdalaný) boıynsha qylmystyq is qozǵaldy. Almaty oblysynda jeke sot oryndaýshysy bir jarym jyl boıy alıment jymqyrǵan. Baspasóz qyzmetiniń málimetterine qaraǵanda, bir jarym aıda boryshkerdiń jalaqysynan sot oryndaýshysynyń arnaıy shotyna balany asyraýǵa dep 816 myń teńge aýdarylǵan. Sot oryndaýshysy bul aqshany balanyń anasynyń shotyna ári qaraı aýdarmaǵan.
Qoǵamdyq uıyqtaý kúni
Mundaı kúndi estýińiz bar ma? Búgin jumys ornynda uıyqtaýǵa bolady. Qoǵamdyq uıyqtaý kúni týraly kópshilik bile qoımas. Óıtkeni bul adamnyń erekshe jaǵdaıda uıyqtaýǵa beıimdiligimen baılanysty. Bul mereke qoǵamdyq uıqy kúni nemese qoǵamdyq uıyqtaý kúni dep atalady (Qoǵamdyq uıyqtaý kúni). Ol jyl saıyn 28 aqpanda atap ótiledi.
Tabıǵatty lastama!
Eýroparlament depýtattary «Tabıǵatty qalpyna keltirý» týraly jańa zańdy maquldady. Soǵan sáıkes kók týnesti zańsyz aýlaǵandar, ýly qaldyqtardy jersindirip, qorshaǵan ortany lastaǵandar, ozon qabatyn buzatyn zattardy paıdalanǵandar qylmystyq jazaǵa tartylady. Ekosıdke jol berip, adam ólimine sebepker bolǵan kásiporyn basshylary 8-10 jylǵa deıin túrmege toǵytylmaq.
Erden ketseń de, elden ketpe!
Qyrǵyzstan mınıstrler kabınetiniń tóraǵasy Aqylbek Japarov áleýmettik jelide óz pikirin bildiretin áıelderge shekteýler engizýdi usyndy. Ol óziniń orynbasary Edıl Baısalovqa áleýmettik jelilerde paıda bolatyn jarıalanymdarǵa monıtorıń júrgizýdi tapsyrdy. Mınıstrler kabıneti basshysynyń aıtýynsha, ajyrasqan áıel kúıeýi men onyń ata-anasy týraly teris pikir bildirmeýi tıis.
«Biz dástúrlerimiz ben ádet-ǵuryptarymyzǵa qaıshy keletin aqparattyń taralýyn shekteýimiz qajet. Keıbir kelinder týǵan ákesin maqtap, qaıyn atasy men qaıyn enesin dattaıdy. Al ajyrasqan kezde olar óz pikirlerin áleýmettik jelide bildiredi. Bul úlgi alar úrdis emes», dedi mınıstrler kabınetiniń tóraǵasy.
Keńestiń kózi edi...
KSRO-nyń sońǵy úkimet basshysy Nıkolaı Ryjkov 95 jasynda dúnıeden ozdy. Qoǵam qaıratkeriniń aqtyq demi Máskeý qalasynda shyqty. 1980 jyldardyń ortasyndaǵy ekonomıkalyq jańalyqtarda jetekshi ról atqarǵan ol alǵash shaǵyn kásipkerlikti qoldaýǵa qaraı bet burǵan.
Nıkolaı Ryjkovty qyzmetinen 1990 jyldyń 25 jeltoqsanynda KSRO prezıdenti Mıhaıl Gorbachev bosatqan.
Jyr jolbarysy
«HH ǵasyrdyń Gomeri» atanǵan Jambyl Jabaevtyń týǵan kúni.
Jambyl Jabaev 1846 jyldyń 28 aqpanynda Jambyl oblysyndaǵy Jambyl taýynyń eteginde dúnıege kelgen. Uly júzdiń Shapyrashty taıpasynyń Ekeı rýynan shyqqan. Arǵy atalary dáýletti bolǵanymen, Jambyldyń ákesi Japa sharýa kisi bolǵan. Keı tarıhı derekte jyr alybynyń ákesi týraly shoqpyt shapandy kedeı bolǵan degen de sıpattama kezdesedi.
"Qaqaǵan qar aralas soǵyp boran,
El úreı - kók naızaly jaý toryǵan.
Baıǵara, Jambyl, Handa men týyppyn,
Jambyl dep qoıylypty atym sodan", - deıdi Jambyl aqyn.
Jambyl 1945 jyly 22 maýsymda Almaty oblysynyń Uzynaǵash eldi mekeninde 99 jasynda dúnıeden ótken.