Móńke bıdiń bolashaqty boljaýy
Azarsyń, jurtym, azarsyń,
Azaryńnyń belgisi:
Quramaly, qorǵandy úıiń bolady,
Aınymaly, tókpeli bıiń bolady.
Halyqqa bir tıyn paıdasy joq
Aı saıyn bas qosqan jıyn bolady.
İshine shyntaq aınalmaıtyn
Ejireı degen ulyń bolady.
Aqyl aıtsań aýyryp qalatyn
Bedireı degen qyzyń bolady.
Aldyńnan kes-kestep ótetin
Kekireı degen keliniń bolady.
İshkeniń sary sý bolady,
Berseń ıtiń ishpeıdi,
Biraq adam oǵan qumar bolady.
Qınalǵanda shapaǵaty joq jaqynyń bolady.
It pen mysyqtaı yryldasqan,
Erkek pen qatynyń bolady...
Azarsyń, jurtym, azarsyń,
Azaryńnyń belgisi:
Jas baladan bıiń bolar,
Jas balshyqtan úıiń bolar,
At jaqsysy arbada bolar,
Jigit jaqsysy saýdada bolar.
Kóldiń sýy bitip, tabany qalar,
Attyń júırigi ketip, shabany qalar.
Jaqsynyń ataǵy ketip, azaby qalar,
Áýlıeniń arýaǵy ketip, mazary qalar.
Sózdiń mańyzy ketip, samaly qalar,
Sóıtip, aqyly joq, sanasyzdyń zamany bolar.
Erteńine senbeıtin kúniń bolady.
Betińnen alyp túser iniń bolady.
Alashubar tiliń bolady,
Dúdámaldaý diniń bolady.
Áıeliń bazarshy bolady,
Erkegiń qazanshy bolady,
Jylqy juldyz bolady,
Qoı qundyz bolady.
Kebir - jerge teńeledi,
Áıel - erge teńeledi,
Kól - teńizge teńeledi.
Sıyr - ógizge teńeledi.
Aqyrzaman adamy –
Saǵynyp tamaq jemeıdi,
Ashyny - ashshy demeıdi,
Tapqanyn olja deıdi,
"Alham" bilgenin molda deıdi.
Bir-birine qaryz bermeıdi,
Shaqyrmasa, kórshi kórshige kirmeıdi.
Sarylyp kelip tosady,
Quny joq qaǵazdy sýdaı shashady...
Azarsyń, jurtym, azarsyń,
Azaryńnyń belgisi:
Aqyr zaman halqynyń
Shaıdan basqa asy joq,
Jaqynnan basqa qasy joq.
Laǵynet qamyty moınynda,
Jumystan qolynyń bosy joq.
Árqashan da olardyń
Kóńiliniń hoshy joq.
Bar sharýasy túp-túgel
Endi munyń nesi joq...
Zaman aqyr bolarda –
Jer taqyr bolar,
Halqy paqyr bolar.
Balalar jetim bolar,
Áıelder jesir bolar,
«Á» dese, «má» deıtin kesir bolar.
Bas qosylǵan jerlerde
Áıel jaǵy den bolar,
Jaman-jaqsy aıtsa da,
Óziniki jón bolar.
Oraı salyp bastaryn,
Jalpyldatyp shashtaryn,
Taqymdary jaltyldap,
Emshekteri salpyldap,
Uıat jaǵy kem bolar
Sóıtken zaman kez bolsa,
Túzelýi qıyn bolar.
Azarsyń, jurtym, azarsyń,
Azaryńnyń belgisi:
Qubyladan shyqqan kún
Janyp shyǵar dep edi.
Jalǵany joq bul sózim
Anyq shyǵar dep edi.
Balǵyn-balǵyn kólderden,
Balyq shyǵar dep edi.
Eki basy qaıqaıyp,
Qaıyq shyǵar dep edi.
Qazaq, seniń soryńa
Qyrda - qoqan, oıda - orys,
Jaryp shyǵar dep edi...
Qylmysy jaqqan qylyqty,
Alyp shyǵar dep edi.
Qylmysy jaqpas qyrsyqty
Eki etigi sý bolyp,
Bir jaratqan táńirge
Nalyp shyǵar dep edi.
Aýyldaryn shý qylǵan,
Jaýlyqtaryn tý qylǵan,
Zaıyp shyǵar dep edi.
Kelini - aıǵyr, kempiri Saıaq shyǵar dep edi.
Bir ýysqa tolmaıtyn Aıaq shyǵar dep edi.
Azarsyń, jurtym, azarsyń,
Azǵanyńnyń belgisi:
Taıpaq-taıpaq kólderden
Balyq shyǵar dep edi.
Ol balyqty aýlaıtyn
Úsh ashaly shanyshqy
Qaıyq shyǵar dep edi.
Qamys jaqqan pendeler
Alyp shyǵar dep edi.
Qamys jaqpas qyrsyqty
Eki etegi sý bolyp,
Bir jaratkan
Táńirge Nalyp shyǵar dep edi.
Jaýlyqtaryn tý qylǵan,
Aýyldaryn shý qylǵan,
Zaıyp shyǵar dep edi.
Oqshantaı joq, kise joq,
Belbeý shyǵar dep edi.
Júginis joq, maldas joq,
Kólbeý shyǵar dep edi.
Azarsyń, jurtym, azarsyń,
Azaryńnyń belgisi:
Zaman aqyr adamy
Menmen shyǵar dep edi.
Úı basyna taq etken
Kelin shyǵar dep edi.
Kelisimen kirjıip,
Saıaq shyǵar dep edi.
Bir ýysqa tolmaıtyn
Aıaq shyǵar dep edi.
Qaı jaq bolsa - qonysyń,
Sol jaq shyǵar dep edi.
Buzaý, taıynsha, tanaǵa
Júk artylar dep edi.
Aǵyp jatqan darıa
Sýy tartylar dep edi.
Ózi bolǵan jigitke
Qyz artylar dep edi.
Kókek aıy bolǵanda,
Kempir kúıler dep edi.
Endiginiń qatyny
Baıyn bıler dep edi.
«Týǵan baıym bolar!»-dep,
Arýaq shyǵar dep edi.
Sol arýaqtyń ishinen
Yńǵaıy joq jamannyń
Pyshaǵy men shaqpaǵy,
Qalyp shyǵar dep edi.
Bes qoıǵa alǵan ógiziń
Tegin dersiń dep edi.
Egin egip, tarynyń
Sógin jersiń dep edi.
Jalań aıaqshar ıtterin
Begim dersiń dep edi.
Alysqa degen qamystan
Úı shyǵady dep edi.
Sol úıińniń ishinen
Qunys jaýyryn, qoı butty,
Bı shyǵady dep edi.