Qaraǵandy oblysyndaǵy Shubarkól kómir ken ornyn ıgerýmen aınalysatyn «Shubarkól Premıým» AQ dırektorlar keńesiniń quramy tolyqtaı ózgerdi. Bul ózgeris Tımýr Qulybaevtyń kompanıa quryltaıshylarynan shyǵýynan keıin boldy, dep habarlaıdy aqshamnews.kz.
KASE saıtynda jarıalanǵan qujatqa sáıkes, «Shubarkól Premıým» AQ-nyń burynǵy tóraıymy Lýıza Aqanova jáne taǵy tórt basqarýshy keńesti tastap ketken. Olardyń ornyna kompanıany basqarýǵa jańa dırektorlar taǵaıyndaldy. Dırektorlar keńesiniń jańa tóraǵasy Baýyrjan Raıymbekov, al táýelsiz dırektorlar retinde Nurlan Májen (ol buryn Shyǵys Qazaqstan oblysyndaǵy Sogrınsk JEO-nyń dırektory bolǵan), Dinmuhamed Mýsralıev, Áblimıt Rahmatýllaev jáne Anet Shynybaev qyzmetke kiristi.
Bir apta buryn «Shubarkól Premıým» AQ-nyń ıeleri de aýysqany belgili boldy. Tımýr Qulybaev ózine tıesili 67% úlesin eki belgili bıznesmen – Kenes Raqyshev pen Shýhrat Ibragımovqa satqan bolatyn.
2024 jyldyń 1 shildesine deıin «Shubarkól Premıým» AQ-nyń taza shyǵyny 6,3 mıllıard teńgeni quraǵan. Kompanıanyń jalpy aktıvteri 72,3 mıllıard teńge dep eseptelgen.