Túrkistan oblysynda UQK qyzmetkerleri endi Nursultan Nazarbaevty kúzetpeıtin bolady.
"Ashyq NQA" portalynda Ulttyq qaýipsizdik komıtetiniń Túrkistan oblysy departamenti týraly erejege ózgerister engizetin buıryq jobasy jarıalandy. Bul quqyqtyq aktiden Qazaqstannyń tuńǵysh prezıdenti Nursultan Nazarbaevqa qatysty eskertpe alynyp tastalmaq, dep habarlaıdy aqshamnews.kz.
Erejede «Elbasy» degen sózben tikeleı Nursultan Nazarbaevqa silteme jasaýdyń ornyna, endi UQK qyzmetkerleri Túrkistan oblysynda «basqa kúzetiletin tulǵalardyń» qaýipsizdigine jaýapty bolady degen jańa tujyrymdama engiziledi.
Bul buıryq, shamasy, Konstıtýsıalyq «Qazaqstan Respýblıkasynyń tuńǵysh prezıdenti – Elbasy týraly» zańnyń kúshin joıýmen baılanysty Túrkistan oblysy UQK departamentiniń qyzmetin retteý maqsatynda qabyldanyp otyr.
Aıta keterligi, dál osy Túrkistan oblysynda UQK departamenti týraly erejeden «Elbasy» ataýynyń alynyp tastalýy nazar aýdartady. Óıtkeni bul aımaq Nursultan Nazarbaevtyń jeke bastamasymen qurylǵan edi, al 2021 jyly Túrkistan qalasynda tuńǵysh prezıdentke arnalǵan eskertkish saltanatty túrde ashylǵan bolatyn .