Almatyda teatr jáne kıno akteri, Memlekettik syılyqtyń ıegeri Áshimov Saǵı Asanáliulynyń qurmetine memorıaldyq taqta ashyldy
Almatyda teatr jáne kıno akteri, Memlekettik syılyqtyń ıegeri Áshimov Saǵı Asanáliulynyń qurmetine arnalǵan memorıaldyq taqta saltanatty túrde ashyldy. İs-sharaǵa Almaty qalasy ákiminiń orynbasary Arman Qyryqbaev, Qazaqstannyń Eńbek Eri, halyq artısi, memlekettik syılyǵynyń laýreaty Asanáli Áshimov, QazKSR halyq artısi, QazKSR eńbek sińirgen óner qaıratkeri Esmuhan Obaev, M. Áýezov atyndaǵy Qazaq ulttyq drama teatrynyń dırektory Erkin Jýasbek, Qazaqstannyń eńbek sińirgen qaıratkeri Bolat Ábdilmanov, QazKSR eńbek sińirgen artısi Janna Qýanysheva, «Qazaqfılm» AQ prezıdenti Azamat Satybaldy jáne t.b. qatysty, dep habarlaıdy Almaty-akshamy.kz
Saǵı Áshimov 1961 jyly 18 shildede dúnıege kelgen. «Óz dánińdi ósir» (1978), «Mazasyz balalary» (1980), «Oılanýǵa bir aı» (1981), «Qaraly sulý» (1982), «Aısulý jaıly ańyzdaǵy» (1990), «Fara» (1999) syndy fılmde 20-dan astam rólde oınaǵan. 1982-1984 jyldary ákesi Asanáli Áshimovtiń «Shoqan Ýálıhanov» atty 4 serıaly televızıalyq fılminde Shoqannyń rólin somdaıdy. Saǵı Áshimov 1999 jyly 18 qazanda «Toǵysqan taǵdyrlar» atty alǵashqy qazaqstandyq serıaldyń túsirilimi kezinde qaıtys boldy.
«Quıryqty juldyzdaı jarq etti de, joq boldy». Bul sózdi aıtqanda ıisi qazaqtyń oıyna eki adam oralady. Biri – Shoqan Ýálıhanov. Ekinshisi – sol Shoqannyń beınesin ekranǵa ákelgen Saǵı Áshimov. Saǵı somdaǵan ár keıipker ishki tazalyǵymen, shynaıylyǵymen astasatyn. Saǵıdyń kınofılmderde somdaǵan rólderi árqashan el jadynda qalatyny sózsiz. Ómirge alý úshin emes, berý úshin kelgen azamat. Dosyna, eline, jerine, otbasyna, bala-shaǵasyna nur bop kelgen adam edi. Biraq sol nurymyz erterek sóndi», - dedi ashylý saltanatynda Almaty qalasy ákiminiń orynbasary Arman Qyryqbaev.
Memorıaldyq taqta ornatylǵan ǵımarattyń mekenjaıy: Dostyq dańǵyly, 40 (Qabanbaı batyr kóshesiniń qıylysy).