Almatylyq qutqarýshylar jyl basynan beri qalanyń 117 turǵynynyń ómirin saqtap qaldy. Sonymen qatar, Almaty qalasy TJ Departamentiniń Órt sóndirý jáne avarıalyq-qutqarý jumystary qyzmetiniń kúshimen qaýipti aımaqtardan 520 adam evakýasıalandy, 449 órt óshirildi, dep habarlaıdy Almaty-akshamy.kz
Almaty qalasynyń órt sóndirýshileri, qutqarýshylary, ushqyshtary, dárigerleri, kınologtary, psıhologtary osyndaı jetistikpen ózderiniń kásibı merekelerin atap ótip jatyr. Búgin, 19 qazan kúni Qazaqstanda Qutqarýshylar kúni atap ótiledi. Dál osy kúni 1995 jyly Tótenshe jaǵdaılar jónindegi memlekettik komıtet quryldy, al 2008 jyldan bastap Qazaqstandaǵy kásibı merekelerdiń tizimine kiredi.
Megapolıste Tótenshe jaǵdaılar kezindegi is-áreketter týraly qala turǵyndaryn qulaqtandyrýǵa erekshe nazar aýdarylady. Mysaly, TJD qalalyq kýrstarynda tabıǵı jáne tehnogendik sıpattaǵy TJ qaýpi men týyndaýy kezindegi júris-turys pen alǵashqy medısınalyq kómek kórsetý erejesine 1 263 adam oqytyldy.
Bilim basqarmasymen birlesip 270 myńnan astam oqýshyny qamtıtyn 124 ınteraktıvti sabaq ótkizildi. Uıymdar 9 364 jattyǵý ótkizdi.
Apattar medısınasy ortalyǵy men QR Qyzyl Jarty Aı qoǵamynyń mamandaryn jumyldyra otyryp, 67 myń adam stasıonarlyq túrde oqýdan ótip, 279 kóshpeli sabaq ótkizildi.
Qazaqstandyq qutqarýshylar elimizben birge, shetelderde de tótenshe jaǵdaılardyń aldyn alý jáne joıý barysynda quzyrettiligi men jedeldigin birneshe ret dáleldedi. Mysaly, otandyq mamandar Túrkıa Respýblıkasyndaǵy joıqyn jer silkinisinen keıin zardap shekkenderge shuǵyl kómek kórsetýge qatysty. Aıta keteıik, bıyl kóktemde Almaty qalasy boıynsha QR TJM Apattar medısınasy ortalyǵynyń dárigeri – fılıal basshysy Jazylbaı Qozybahov qyzmettik boryshyn óteý kezinde janqıarlyq erlik kórsetip, «Erligi úshin» medalimen marapattaldy.
«Túrkıada jumys istegen kezde almatylyq qutqarýshylar úlken tájirıbe aldy, ol qajet bolǵan jaǵdaıda basqa elderde qoldanylady. Sol kezde túrik áriptesteri Almatyda túrik qutqarýshylaryn oqytýdy usyndy, mamandaryn jiberýge daıyn edi. Bul árıne, barlyǵymyz úshin qıyn jaǵdaıda jedel jumys isteýge jáne qajet bolǵan kezde ýaqytyly kómek kórsetýge yntalandyrý. Men ózim dárigerler otbasynda óstim, sondyqtan bul is meniń ómirim», - deıdi fılıal basshysy – Almaty qalasy boıynsha QR TJM Apattar medısınasy ortalyǵynyń dárigeri Jazylbaı Qozybahov.
Barlyq tabıǵı jáne tehnogendik sıpattaǵy TJ-nyń 80%-dan astamy órt. Órt sóndirýshi mamandyǵy eń qaýipti mamandyqtardyń biri. Solardyń biri - №1 mamandandyrylǵan órt sóndirý bóliminiń órt sóndirýshi-qutqarýshysy Ádil Dáýrenqulov. Bir jyl buryn ol múmkindigi shekteýli eki jasar balany otqa oranǵan páterden alyp shyqty. Sonymen qatar, qazaqstandyq sportshy Ardaq Nazarov óziniń Instagram paraqshasyna bolǵan oqıǵa týraly jazyp, qutqarýshylardyń is-áreketterine tańdanys bildirdi. Keıin balany qutqarý kezinde kórsetken erligi men kásibıligi úshin Qazaqstan Respýblıkasynyń Prezıdenti Qasym-Jomart Toqaev erjúrek qutqarýshyǵa «Erligi úshin» medalin tabystady.
«Mamandyǵymdy maqtan tutamyn. Bala kezimnen adamdarǵa kómektesý úshin forma kıýdi armandadym. Men úshin jaýapty mısıa - adam ómirin qutqarý», - deıdi Ádil Dáýrenqulov.
Almatynyń avarıalyq-qutqarý qyzmetinde barlyǵy 1,5 myńnan astam adam jumys isteıdi. Óz ómirin qaterge tige otyryp, olar ýaqytpen sanaspaı órtti sóndiredi, tabıǵı apattyń saldarymen kúresip, túrli jaǵdaıda adamdardyń ómirine arashat úsedi.