Federasıa basshysynyń kandıdatýrasyn kezekti konferensıada daýys bergen barlyq 16 qatysýshy biraýyzdan qoldady
2 jeltoqsan kúni Astanada Qazaqstan dzúdo federasıasynyń kezekti konferensıasy ótti. Sharada osy sport túri boıynsha bir jyldyń ishinde atqarylǵan jumystar qorytyndylanyp, salanyń aımaqtaǵy jaı-kúıi men damýynyń barysy týraly esep tyńdaldy. Konferensıa barysynda Qazaqstan dzúdo federasıasynyń prezıdenti laýazymyna «Qazaqtelekom» AQ Basqarma tóraǵasy Qýanyshbek Esekeev saılandy, dep habarlaıdy Almaty-akshamy.kz.
Jıynǵa QR Mádenıet jáne sport vıse-mınıstri Serik Jarasbaev, QR Mádenıet jáne sport mınıstrligi Sport jáne dene shynyqtyrý isteri komıtetiniń tóraǵasy Samat Erǵalıev, Qazaqstan UOK Bas dırektory Serik Qasqabasov, QR dzúdo federasıasynyń bas hatshysy Asqat Jitkeev, sondaı-aq óńirlik dzúdo federasıasynyń prezıdentteri men vıse-prezıdentteri qatysty.
Federasıa basshysynyń kandıdatýrasyn kezekti konferensıada daýys bergen barlyq 16 qatysýshy biraýyzdan qoldady. Osy jaýapty laýazymǵa laıyqty dep «Qazaqtelekom» AQ Basqarmasynyń tóraǵasyn tańdaý beker emes, Qýanyshbek Esekeev óziniń negizgi qyzmetinen bólek, otandyq sportpen baılanysty birneshe qurylymdarda tıimdi qyzmetimen kózge túsken.
Esterińizge sala keteıik, 2018 jyly Qazaqstanda kıbersport resmı qyzmetin bastaǵan sátten beri Esekeev myrza Qazaq CyberSport Federation - qazaqstandyq kıbersport federasıasyn basqardy. Onyń basshylyǵymen osy federasıa qysqa merzim ishinde turaqty túrde ótetin ulttyq týrnırlerdiń tutas jelisin, sonyń ishinde QR-nyń kıbersporttan resmı birinshiligi - Qazaqstan Respýblıkasynyń Kýbogyn óristete aldy.
Budan basqa, Qazaq CyberSport Federation qysqa merzimde qazaqstandyq jáne halyqaralyq týrnırlerdi ótkizý úshin qajetti ınfraqurylymdy qurdy, al otandyq kıberatletter men komandalar taıaý jáne alys shetelderden kelgen qarsylastarmen básekelestikte olardyń sheshýshi kezeńderine joldamalar ala otyryp, eń bedeldi álemdik is-sharalardyń turaqty qatysýshylary bolyp tabylady.
Sonymen qatar, «Qazaqtelekom» AQ Basqarma basshysy «Qazaqstan Barysy» qazaq kúresin qoldaý jáne damytý qoǵamdyq qorynyń qamqorshylyq keńesiniń tóraǵasy bolyp tabylady, ol osy sport túrinen «Qazaqstan Barysy» negizgi týrnırin elde jáne shetelde tanymal etýge eleýli úlesin qosyp keledi.
Qýanyshbek Esekeev konferensıa qatysýshylaryna kórsetken senimi úshin alǵys bildirip, Qazaqstan dzúdo tarıhynda kóptegen dańqty betterdiń jazylǵanyn jáne elimizde osy olımpıadalyq sport túriniń tanymaldyǵy qazaqstandyqtardyń halyqaralyq arenalardaǵy jetistikterin saqtap qana qoımaı, kóbeıtýge múmkindik beretinin atap ótti.
«Balýandyq dástúri joǵary deńgeıde qalyptasqan Qazaqstan halqy úshin dzúdo óneri de jat emes. Barshamyz bilemiz, elimizde balýandyq ónerdiń tarıhy tereń, árige barmaı-aq, jaýyryny jerge tımegen Qajymuqan, Balýan Sholaq atalarymyzdan bastap, búginde álemdik deńgeıde top jarǵan talaı túıe balýandarymyzdy aýyz toltyryp aıta alamyz. Búginde "Qazaqstan barysyn" álem biledi, bul salanyń sózsiz kóshbasshylary, aty ańyzǵa aınalǵan shoqtyǵy bıik sportshylarymyzdyń toby qalyptasqan. Mine, osy sekildi qazaqstandyq dzúdo óneriniń de juldyzdaryn qalyptastyrýymyz kerek. Otandyq dzúdo óneri áli de óziniń múmkindikterin tolyqqandy kórsetken joq, aýyldarda beldesip ósken talaı qarakózden chempıondar jasaımyz», - dep atap ótti jańa saılanǵan Qazaqstan dzúdo federasıasynyń Prezıdenti Qýanyshbek Esekeev.
Sondaı-aq, konferensıa barysynda el óńirlerinde dzúdonyń damýy, federasıanyń 2022 jyly sporttyq is-sharalardy ótkizýi jáne QR Ulttyq quramasynyń 2024 jyly Fransıada ótetin Olımpıada oıyndaryna daıyndyq barysy týraly esepter tyńdaldy. Atap aıtý kerek, dzúdo - sportsúıer qaýym úshin, jastar úshin asa qyzyqty ári tartymdy sport túri. Alty jyl buryn Almatyda Dzúdo akademıasy ashylǵan bolatyn, onda bolashaǵynan úmit kúttirer jas sportshylar Qazaqstan ulttyq quramasynyń múshelerimen birge jattyǵýyna múmkindigi bar. Búgingi tańda Qazaqstanda dzúdomen aınalysatyn sportshylar sany 90 myńǵa jýyqtady. Bul kórsetkish kúrt ulǵaıýy ábden múmkin, sebebi dál osy sport túrine baýlıtyn seksıalar men klýbtar sany bir ǵana Astananyń ózinde bir jylda 3 ese artqan, ıaǵnı 2021 jyly dzúdo kúresin damytatyn 11 sport klýb jumys istese, búginde mundaı ortalyqtar sany 35-ke jetti.