Jyl úlken nátıje berdi, erekshe qajettilikteri bar balalarǵa erekshe kóńil bólindi
2022 jyldyń 7 jeltoqsanynda saǵat 11.00-de Qazaqstan Respýblıkasy Memlekettik ortalyq mýzeıinde Balalar jylyna arnalǵan «Uly dala urpaqtary» respýblıkalyq festıvali ótedi, dep habarlaıdy Almaty-akshamy.kz.
Bıyl Qazaqstan Respýblıkasy Memlekettik ortalyq mýzeıinde Balalar jylyna arnalǵan sharalar óte aýqymdy jáne nátıjeli boldy. 2022 jyl boıy jasóspirimderge arnalǵan baǵdarlamalardy, bastamalary men ıdeıalaryn qoldaý, shyǵarmashylyq jáne ıntellektýaldy damytýǵa baǵyttalǵan jarqyn is-sharalar, aksıalar, is-sharalar, festıváldar, kvestter, spartakıadalar ótkizildi. Ol bizdiń respýblıka balalarynyń mýzyka, óner, shyǵarmashylyq, qolóner, sport, t.b. túrli salalar men baǵyttardaǵy úlken jetisteri men kórsetkishterin pash etti. Jyl úlken nátıje berdi, erekshe qajettilikteri bar balalarǵa erekshe kóńil bólindi. Mektep oqýshylary, balalar úıleri men mektep-ınternattary arasynda ulttyq oıyndardan sporttyq týrnırler, «Mýzeı kýbogy» spartakıadasy, «Daryndy balalar sherýi» respýblıkalyq festıvali, sheberlik sabaqtar, halyqaralyq, respýblıkalyq balalar kórmeleri, t.b. uıymdastyryldy. Qazirgi ýaqytta mýzeıde Balalar kovorkıng ortalyǵy jáne «Ólketaný», «Bulaq», «Jas ekskýrsıa júrgizýshisi» úıirmeleri jumys isteıdi.
2022 jyldyń 7 jeltoqsanynda Qazaqstan Respýblıkasy Ortalyq mýzeıinde Balalar jylynyń jabylýyna arnalǵan festıvál aıasynda kelesi is-sharalar josparlanyp otyr:
- Balalar mýzykalyq ujymdarynyń qatysýymen konsert – «Fıesta» shoý-baleti, №5 oqýshylar úıi, Almaty qalasy Oqýshylar saraıy, K.Baıseıitova atyndaǵy daryndy balalarǵa arnalǵan respýblıkalyq mamandandyrylǵan mýzykalyq mektep-ınternaty;
- «Uly dala urpaqtary» balalar shyǵarmashylyǵynyń respýblıkalyq kórme-baıqaýynyń ashylýy jáne baıqaý jeńimpazdaryn marapattaý. Kórmede elimizdiń ártúrli óńirlerinen (Almaty jáne Mańǵystaý oblysy, Almaty, Aqtaý, Atyraý, Shymkent, Petropavl, Pavlodar, Taraz qalalary) iriktelgen daryndy balalardyń 500-ge jýyq shyǵarmashylyq jumystary usynylady. Óner týyndylarynyń ishinde talantty balalardyń (aǵash, metal, plasmassa, mata, jún, shı, t.b.) jumystarynda beınelengen ártúrli túrler men tehnıkalardy, materıaldardy, taqyryptar men ıdeıalardy kórsetetin keskindeme, grafıka, sándik-qoldanbaly óner buıymdary bar.
- Qalanyń jalpy bilim beretin mektepteri men mektep-ınternattary arasynda ulttyq oıyndardan «Mýzeı kýbogy» qalalalyq spartakıadasynyń jeńimpazdaryn marapattaý (mýzeıden kýbok usynylady);
- Mýzeıdiń úzdik jas ekskýrsıa júrgizýshisin marapattaý – «Jas ekskýrsıa júrgizýshisi» úıirmesine qatysýshylar;
- Mektep oqýshylary arasyndaǵy «Meniń qalamdaǵy mýzeı» respýblıkalyq ǵylymı jobalar baıqaýynyń qorytyndysyn shyǵarý.
Bul kúni balalar N.Sas atyndaǵy orys Memlekettik akademıalyq balalar men jasóspirimder teatrynyń qoıylymdaryn («Aldar kóse» qoıylymyn) jáne qýyrshaq teatryn tamashalaı alady. Sonymen qatar, O.Tańsyqbaev atyndaǵy Almaty sándik-qoldanbaly óner kolejinen jáne Almaty qalasynyń kórkemsýret stýdıalarynan, ónerdiń ártúrli baǵyttary boıynsha sheberlik sabaqtary uıymdastyrylady.