Sot joǵary oqý ornynyń aksıalaryn ulttyq kompanıaǵa qaıtarý boıynsha QTJ talaptarynyń zańdylyǵyn rastady, dep habarlaıdy almaty-akshamy.kz Kazinform-ǵa silteme jasap.
Joǵary oqý ornynyń bazalyq profılin saqtaý, kadrlar daıarlaý jáne QTJ quzyrettilik ortalyǵyn qurý úshin JOO aktıvterin qaıtarý jumystaryn júrgizdi. Kompanıanyń bul ustanymyn ardagerler de, salanyń qazirgi qyzmetkerleri de qoldaǵan.
"Qazaqstan temir joly" AQ-nyń málimetinshe, 2022 jyly QTJ bas prokýratýraǵa kompanıanyń buryn jekeshelendirilgen aktıvteriniń tizimin usynǵan. Onda negizgi nysandardyń biri «M.Tynyshpaev atyndaǵy Qazaq kólik jáne komýnıkasıalar akademıasy» AQ (qazirgi «Logıstıka jáne kólik akademıasy») boldy. 2018 jyly QazKKA aksıalarynyń 100% paketin «Alimax Group» JSHS 10 250 999 999 teńgege satyp aldy.
"Satyp alý-satý shartyna sáıkes satyp alýshy 5 jyl ishinde QazKKA aksıalarynyń 100% paketine qatysty mámileler (qaıta satý, kepil, basqarýǵa berý jáne basqalar) jasaýǵa quqyǵy joq. Satyp alýshy mámileniń osy sharttaryn buzǵan. Iaǵnı, QazKKA-nyń 100% aksıalaryn jańa zańdy tulǵaǵa bere otyryp, menshik ıesiniń kompanıasyn (Alimax) qaıta uıymdastyrý júrgizildi. Bul QazKKA-ny QTJ paıdasyna qaıtarý týraly birinshi jáne ekinshi satydaǵy sottardyń sheshim qabyldaýyna negiz boldy", - dep habarlady QTJ - da.
QTJ salada tıimdi jumys isteý úshin qajetti bilimi men daǵdylary bar mamandardy daıarlaý úshin úzdik otandyq jáne álemdik tájirıbelerdi qoldanýdy josparlap otyr.
Aıta keteıik, Logıstıka jáne kólik akademıasy 1931 jyly qurylǵan. Ol temirjol, avtokólik, sý kóligi jáne komýnıkasıaǵa qajetti bilikti stýdentterdi daıarlaýda Qazaqstannyń negizgi mamandandyrylǵan joǵary oqý orny bolyp tabylady. Onyń quramyna Almaty, Astana, Aqtóbe, Shymkent, Aqtaý qalalaryndaǵy 5 kolej kiredi.