Arýjan Álimbetova Dýbaıdaǵy Emirates áýekompanıasynda bortserik bolyp qyzmet etedi.
Ony munda maqsatyna jetpeı qoımaıtyn qaısar minezi jetelegen. Armany asqaq qyzdyń aqyly kórkine saı. Názik bolmysyna bortserik kıimi quıyp qoıǵandaı, dep habarlaıdy almaty-akshamy.kz egemen.kz-ke silteme jasap.
Shetelde eńbek etip júrgen qarakóz qyzymyz nebári 24 jasta. Qyzylorda oblysy Baıqońyr qalasynda týyp-ósken. Ózi Almatydaǵy QazUÝ-dyń túlegi. «Aýdarma isi» mamandyǵy boıynsha bilim alǵan. Alǵashynda Air Astana kompanıasynda eki jyldaı ýaqyt jumys istep, bıyl Emirates-ke ornalasty. Ósken óńirden jyraqqa ketý úıiniń jalǵyz qyzyna ońaı emes árıne. Bar jaqsyny balam kórsin deıtin anasy úlken qoldaý bildiripti. Sóıtip qazir Arýjan Dýbaıdaǵy ómirge tolyq beıimdelgen.
«Dýbaı – óte qaýipsiz, taza ári zamanaýı qala. Mundaǵy turǵyndardan ózara syılastyqty úırendim. Kez kelgen ult ókiline dostyq yqylaspen qaraıdy. Asyqqan adamdy kórmeısiń. Halqy tártipke baǵynǵan, urlyq joq. Bir jerde qaldyryp ketken zatyńa eshkim tıispeıdi. Tún ortasynda jalǵyz dúkenge barý da qorqynyshty emes. Sómkeń aýyr bolsa dúken qyzmetkerleri zatyńdy úıińe deıin aparyp berýge bar», dedi A.Álimbetova.
Onyń bul qalada turyp jatqanyna segiz aı boldy. Jańa jerge tezirek úırenisýine álbette súıikti isiniń yqpaly kóp.
Ol bul kompanıaǵa talaı kezeńnen turatyn irikteýden ótip keldi. Sheteldik kompanıanyń Almatyda ótkizgen irikteýine 76 adam qatysyp, sonyń jeteýi synaqtan súrinbeı ótti. Arýjan sonyń biri.
«Úlken áýekompanıa bolǵandyqtan ártúrli elderge sapar shegedi. Ekıpajda árdaıym ártúrli ult ókilderi bolady. Sol sebepti kompanıa túrli tulǵalardy izdeıdi. Bizdegi bortserikterdiń árqaısysy ártúrli minezdi. Bárimizdi dostyq uıystyrady», - deıdi bortserik qyz.
Kompanıa qyzmetkerlerdiń densaýlyǵyna jiti kóńil bóledi. İrikteýden ótken olar eń áýeli medısınalyq tekseristen ótken. 2 aı ýaqytty aǵylshyn tilin jetik meńgerýge arnaǵan. Budan soń avıasıaǵa qatysty teorıalyq bilimdi jetildirip, bortserik qyzmetine kirisken. Qyzmetkerler alty aı ýaqyt synaq merziminde júredi. Bul mezette tájirıbeli bortserikter jańa jumyskerlerge túsinistikpen qarap, kómegin aıanyp qalmaıdy.
Kompanıa qyzmetkerlerdiń jumys isteýine, jaıly ómir súrýine bar jaǵdaıdy jasap qoıǵan. Turatyn tegin úı, ekıpajǵa arnalǵan kólik degen syndy muqtajdyqtardyń barlyǵy qarastyrylǵan. Arýjan bul qyzmetin álemniń ár túkpirine taban tıip, túrli órkenıetpen tanysa alatyny úshin de jaqsy kóredi. Búginde ol 22 elde bolypty. Ár saıahattan jańa emosıa, kúsh alamyn deıdi ol.
Sheteldegi qomaqty jalaqy men jaıly ómirge úırengen jastardyń otanyna oralmaı qalyp jatqan mysaly kóp. Osy oraıda Baıqońyrda týǵan qyz: «Otan ottan da ystyq. Túbi bir kúni elge oralatynymdy bilemin», -deıdi.