Bıyl ultymyzdyń uly perzenti, Qazaqstandaǵy geologıa ǵylymynyń negizin qalaýshy, memleket jáne qoǵam qaıratkeri Qanysh Sátbaevtyń týǵanyna 125 jyl tolady.
Ol geolog qana emes, ádebıetshi, tarıhshy, etnograf, matematık, pedagog te boldy. Qazaq jeriniń baılyǵyn búkil álemge tanytyp, ǵylymynyń damýyna dańǵyl jol salyp ketti, dep habarlaıdy almaty-akshamy.kz 24.kz-ke silteme jasap.
Prezıdent Qasym-Jomart Toqaevtyń «Egemen Qazaqstan» gazetindegi suhbatynda el tarıhynda erekshe orny bar tulǵalarǵa qurmet kórsetý dástúriniń aıryqsha mańyzǵa ıe ekendigi aıtylǵan. Áıgili ǵalymnyń mereıtoıyna oraı el kóleminde aýqymdy is-sharalar júzege aspaq.
Jambyl Artyqbaev, tarıh ǵylymdarynyń doktory, profesor: - Qanysh Imantaıuly Sátbaev – qazirgi qazaq ǵylymynyń negizin qalaǵan, sonyń irgetasyn myqtap bekitip bergen uly ǵalymdarymyzdyń biri. Árıne, ol alǵashqy ǵalym emes qazaq tarıhyndaǵy. Qanysh Imantaıulynyń shyqqan ortasynyń ózi ǵylymı orta bolatyn. Qanysh Imantaıulynyń búkil ǵumyryn qazaq ǵylymyna arnaýy – zańdy qubylys. Endi búgingi kúni qazaq jastaryna, qazaq azamattaryna úlgi bolatyn tulǵa qandaı desek, osy Qanekeńdi aıtýymyz kerek. Ǵylymnyń bedelin, berekesin kóterý úshin bizge Qanyshtyń tulǵasy asa mańyzdy.