Qazaqstan Respýblıkasynyń Ulttyq mýzeıi «Jibek jolynyń ortaq murasy» vırtýaldy kórmesinde óz koleksıasynan 10 eksponat usyndy.
Jobany IýNESKO-nyń Almatydaǵy Óńirlik keńsesi júzege asyrdy, dep habarlaıdy aqshamnews.kz Mádenıet jáne aqparat mınıstrliginiń baspasóz qyzmetine silteme jasap.
Vırtýaldy kórme Google Arts & Culture platformasynda jarıalanǵan jáne ony myna silteme arqyly tamashalaýǵa bolady https://artsandculture.google.com/pocketgallery/nAWxtrFiZ4dQ1Q.
Google Arts & Culture – bul álemdegi seriktes mádenı uıymdardyń óner týyndylary men mádenı artefaktileriniń joǵary sapadaǵy sýretteri men beıneleri bar Google basqaratyn onlaın platforma.
Qazirgi ýaqytta servıs ujymy keminde 80 eldegi 2 myńnan astam mádenı mekemelermen yntymaqtastyq ornatqan. Qoldanýshylar platformadan óner týyndylarynyń kóshirmelerin, sáýlet eskertkishteri men IýNESKO-nyń Búkilálemdik mura nysandary týraly málimetterdi taba alady. Sondaı-aq, saıtta búkil álemdegi mádenı mekemelerdiń muraǵattaryn kórýge múmkindik beretin sıfrlyq kórmeler bar.
«Jibek jolynyń ortaq murasy» vırtýaldy kórmesi Iran, Qazaqstan, Qyrǵyzstan, Ózbekstan, Tájikstan men Túrkmenstannyń ulttyq mýzeılerinen Jibek jolynyń mádenı murasyn sıpattaıtyn 60 kórnekti mýzeı jádigerinen turady.