Qazirgi ýaqytta Batys Qazaqstan oblysynda sý basqan 53 turǵyn úıi men Aqtóbe oblysynda 57 saıajaı úıi baqylaýda tur.
2021-2023 jyldarǵa arnalǵan sý tasqynyna qarsy is-sharalardyń Jol kartasy sheńberinde 2021 jyly iske asyrý josparlanǵan 68 is-sharanyń 33-i oryndaldy, dep habarlaıdy Almaty-akshamy.kz QazAqparatqa silteme jasap.
QR Tótenshe jaǵdaılar mınıstrliginiń baspasóz qyzmetiniń málimetterine qaraǵanda, aıaqtalý merzimi 2022-2023 jyldarǵa josparlanǵan 4 is-shara merziminen buryn oryndaldy. Atap aıtqanda, 9,4 shaqyrym ózen arnalary qaıta qurylyp, 22,2 shaqyrymy tazartyldy. 8,2 shaqyrym qorǵanys bógetteri salynyp, bógetterdiń 8,1 shaqyrymna aǵymdaǵy jóndeý jumystary júrgizildi. Eki gıdrotehnıkalyq qurylys salyndy. 4 jergilikti qulaqtandyrý júıesi ornatyldy. Avtomobıl jolynyń astyndaǵy sý ótkizý qubyry aýystyryldy.
Ótken táýlikte óńirler aýmaǵynda jergilikti atqarýshy organdar men TJM kúshteri Aqmola, Aqtóbe, Batys Qazaqstan, Shyǵys Qazaqstan, Pavlodar, Túrkistan oblystarynda jáne Nur-Sultan qalasynda 144 379 tekshe metr erigen qar sýyn sorý jumystaryn júrgizdi. Sondaı-aq Aqmola, Batys Qazaqstan, Shyǵys Qazaqstan, Pavlodar, Aqtóbe oblystarynda ınertti materıaldary bar 7 961 qap tóseldi. Batys Qazaqstan oblysynda 250 sharshy metr alqapta ózenderdegi muzdy kesý jumystary júrgizildi. Batys Qazaqstan oblysynda apattan qutqarý jumystaryna Mańǵystaý jáne Atyraý oblystarynyń TJD kúshteri men quraldary jeke quramnan 92 adam, 13 birlik tehnıka, 2 júzý quraly jáne 6 motopompa jumyldyryldy.
Qazirgi ýaqytta Batys Qazaqstan oblysynda sý basqan 53 turǵyn úı men Aqtóbe oblysynda 57 saıajaı úıi baqylaýda tur. Ótken táýlikte Batys Qazaqstan jáne Aqtóbe oblystarynda 773 adam evakýasıalandy. Olar ýaqytsha evakýasıalaý pýnktteri men týystarynyń úılerine ornalastyryldy. Qaıtys bolǵan jáne zardap shekken adamdar týraly aqparat tirkelgen joq. «TJM «Qazavıaqutqarý» AQ tikushaǵymen Jaqsybaı aýylynan Oral qalasyna 2 júkti áıel jetkizildi. Ótken táýlikte Batys Qazaqstan oblysynda 99 turǵyn úıdi, Aqtóbe oblysynda 57 saıajaı úıin jáne 21 aýla aýmaǵyn sý basty», - delingen habarlamada.
Aqtóbe oblysynyń respýblıkalyq mańyzy bar joldarynyń 2 ýchaskesinde, sondaı-aq Aqtóbe, Qaraǵandy, Batys Qazaqstan jáne Aqmola oblystarynyń oblystyq jáne jergilikti mańyzy bar 14 ýchaskesinde sý tasýda. Osy jumystarǵa TJM, İİM, UQK SHQ, JAO 2 229 adam, 489 birlik tehnıka, 238 sý aıdaý quraly jáne 27 júzý quraly jumyldyryldy. Onyń ishinde TJM jeke quramynan 974 adam, 117 birlik tehnıka, 145 sý aıdaý quraly, 21 júzý quraly bar.
