Bul týraly Úkimettegi Májilis saǵatynda aıtyldy.
QR Aýyl sharýashylyǵy mınıstri Erbol Qarashókeev mal basyna syrǵalardy satyp alý fýnksıasy jergilikti atqarýshy organdarǵa beriletinin aıtty, dep habarlaıdy Almaty-akshamy.kz
«Taǵy bir mańyzdy másele - jergilikti atqarýshy organdardyń josparly vaksınalaýdy júrgizý men birdeılendirý boıynsha tıimsiz jumysy. Bul ákimdikterdiń veterınarlyq preparattardy, janýarlardy birdeılendirýdi júrgizýge arnalǵan bırkalardy jáne qan synamalaryn alý júıelerin satyp alý jáne jetkizý boıynsha mınıstrliktiń jumysyna joǵary táýeldiligimen baılanysty. Satyp alý boıynsha konkýrstyq rásimderdiń uzaqtyǵy, sondaı-aq olardy ákimdikterge berý kezindegi búrokratıa janýarlardy birdeılendirýdi jáne josparly veterınarıalyq-profılaktıkalyq is-sharalardy ótkizý merzimderiniń buzylýyna ákeledi, bul jaýapkershiliktiń tómendeýin kórsetedi», - dedi E. Qarashókeev.
Onyń aıtýynsha, 2022 jylǵy 1 sáýirdegi jaǵdaı boıynsha, aýyl sharýashylyǵy janýarlaryn birdeılendirý bazasynda (ASHJB) 33,3 mln bas tirkeldi.
Onyń ishinde: iri qara mal - 8,3 mln, UQM - 20,6 mln, jylqy - 3,4 mln, túıe - 250 myń bas.
«Alaıda, óńirlerge qulaq syrǵalarynyń ýaqtyly jetkizilmeýine baılanysty ASHJB-ǵa tólderdi tirkeý 2020 jyly júzege asyrylmady. Osyǵan baılanysty mınıstrlik «jasyl dálizdi» iske qosý arqyly olardy tirkeýge májbúr boldy. Nátıjesinde 2021 jyldyń naýryz-mamyr aralyǵynda qosymsha 1,1 mln bas tirkeldi. Qoldanystaǵy birdeılendirý júıesiniń tómen tıimdiligi «jasyl dáliz» sharalaryn únemi júrgizýdi qajet etti», - dedi mınıstr.
Reforma aıasynda osy júıeniń kemshilikterin joıý úshin myna qadamdar qarastyrylǵan:
1. Aýyl sharýashylyǵy janýarlaryn birdeılendirý úshin syrǵalardy satyp alý fýnksıasyn jergilikti atqarýshy organdarǵa berý. Bul rette uıymdastyrylǵan sharýashylyqtarǵa (SHQ, FQ, JSHS jáne t. b.) óz qarajaty esebinen, al jeke qosalqy sharýashylyqtarǵa tıesili janýarlar úshin jergilikti búdjet esebinen júrgizý;
2. Aýdandyq deńgeıde ASHJB derekqoryna túzetýler engizý, túzetýler engizýge arnalǵan algorıtmdi jáne rastaıtyn qujattar tizbesin bekitý, sondaı-aq tirkelmegen mal basyn zańdastyrý múmkindigi maqsatynda aýyl sharýashylyǵy janýarlaryn birdeılendirý jáne derekqordy júrgizý jónindegi normatıvtik aktilerge birqatar ózgerister engizý.
3. ASHJB mobıldi nusqasyn iske qosý. Bul janýarlardy sáıkestendirýdi jáne aldyn alý sharalaryn ýaqtyly júrgizýge múmkindik beredi.