2024 jylǵy 16 maýsymda áıelderdiń quqyqtaryn qorǵaýǵa jáne balalardyń qaýipsizdigin qamtamasyz etýge baǵyttalǵan Zań kúshine endi.
Bul zań balalardyń qaýipsizdigin qamtamasyz etýge baǵyttalǵan naqty sharalardy engizýge jol ashty. Nátıjesinde zorlyq-zombylyq pen qatygezdikke qarsy áreket etý júıeli sıpat aldy jáne alǵashqy oń nátıjeler baıqala bastady, dep habarlaıdy aqshamnews.kz.
2025 jyldyń alǵashqy bes aıynda balalarǵa qatysty jynystyq qol suǵylmaýshylyqty buzý qylmystarynyń sany 2024 jyldyń osy kezeńimen salystyrǵanda 21,3%-ǵa azaıdy. Aýyr qylmystar – 8%-ǵa, asa aýyr qylmystar – 19%-ǵa qysqardy.
Aldyn ala eskertýsiz tekserýler júrgizý týraly normanyń mańyzy asa zor boldy. Bir jyl ishinde Balalardyń quqyqtaryn qorǵaý komıteti 58 tekserý júrgizip, 1500-den astam balanyń quqyǵy qalpyna keltirildi. 24 uıym basshysy ákimshilik, 78 maman tártiptik jaýapkershilikke tartyldy.
Elimizdiń barlyq óńirinde psıhologıalyq qoldaý ortalyqtary ashyldy. 2025 jyldyń basynan bastap bul ortalyqtar 50 myńnan astam azamatqa, sonyń ishinde zorlyq-zombylyqtan zardap shekken balalar men ata-analarǵa kómek kórsetti.
«Bul Zań jekelegen áreketterden júıeli tásilge kóshýge múmkindik berdi. Búginde elimizde balalardy qorǵaýdyń turaqty modeli qalyptasty, onda mektepten bastap ýákiletti ókilge deıingi árbir býyn aldyn alý men kómek kórsetý úshin jumys isteıdi», – dep atap ótti QR Oqý-aǵartý mınıstrliginiń Balalardyń quqyqtaryn qorǵaý komıtetiniń tóraıymy Nasymjan Ospanova.
Balany qorǵaý júıesiniń mańyzdy elementine óńirlik ýákilder ınstıtýty aınaldy. Olar táýelsiz mártebege jáne balalar bar barlyq mekemelerge, sonyń ishinde jabyq uıymdarǵa da kedergisiz kirý quqyǵyna ıe. Oryn alǵan zorlyq-zombylyqtyń árbir faktisi ýákilderdiń tikeleı baqylaýynda.
«111» baılanys ortalyǵy otbasy, áıelder jáne balalardy qorǵaý máseleleri boıynsha biryńǵaı júginý arnasy retinde zańmen bekitildi. 2025 jyldyń basynan bastap 88 myńnan astam ótinish kelip tústi. Mektepterde QR-kod arqyly qupıa túrde habarlama berý júıesi engizildi. Sonymen qatar, «DOSBOLLiKe» antıbýllıngtik baǵdarlamasy júzege asyrylýda, mekteptegi jábirleý úshin ákimshilik jaýapkershilik kúsheıtildi. Vedomstvoaralyq jedel áreket etý algorıtmderi jumys isteıdi.
Memleket basshysy Ulttyq quryltaıdyń IV otyrysynda bergen tapsyrmaǵa sáıkes, balalarǵa kómek kórsetý, olardy qorǵaý jáne zorlyq-zombylyqtyń aldyn alý boıynsha qosymsha sharalar «Qazaqstan balalary» baǵdarlamasynyń tujyrymdamasyna júıeli túrde engiziletin bolady.