Qostanaı oblysynda "Taza Qazaqstan" ekologıalyq baǵdarlamasyn júzege asyrýǵa arnalǵan keńeıtilgen jıyn ótti. Atalǵan sharada oblys ákimi Qumar Aqsaqalov bul bastamanyń ulttyq sana-sezim men bolashaq urpaqqa degen qamqorlyqtyń kórinisi ekenin atap ótti. Bul týraly Aqshamnews.kz saıty habarlaıdy.
Aımaq basshysy "Taza Qazaqstan" baǵdarlamasyn Memleket basshysy Qasym-Jomart Toqaevtyń ózi usynǵanyn, al búginde ol jalpyulttyq sıpatqa ıe qýatty ınfraqurylymdyq jobaǵa aınalyp kele jatqanyn aıtty. Baǵdarlama tek qalalarmen shektelmeı, shalǵaı aýyldardy da qamtı bastady.
Jıynda oblys ákiminiń orynbasary Berik Tanjarıkov alǵashqy jartyjyldyqtaǵy nátıjelermen bólisti. Onyń aıtýynsha, 85 myń aýla abattandyrylyp, 105 kópqabatty úı jóndeýden ótedi. Úsh jylda 500-den astam úı retke keltirilgen. Sonymen qatar, 1030 kóshe jóndelip, 17,5 myń kóshe shamy ornatylady. 123 jańa balalar jáne sport alańy salynady. Jasyl jelek kólemi 105 myń birlikten asyp, zańsyz qoqys kólemi úsh esege azaıǵan.
Oblystyń barlyq aýdandarynda "Jasyl El" jastar qozǵalysy jumys istep, "Taza aýla", "Úzdik aýyl" sekildi baıqaýlar ótkizilip keledi. Máselen, Altynsarın aýdanynda 12 aýyl jaryqpen qamtylyp, saıabaqtar abattandyrylsa, Amangeldi aýdanynda kóktem aılarynda 285 tonna qoqys shyǵarylyp, 1200 aǵash egilgen. Jitiqara aýdanynda jasandy ıntellekt arqyly beınebaqylaý engizilip, kún elektr stansıalary iske qosyldy.
Balalar men jasóspirimderdiń bastamalary da nazardan tys qalmady. Zarechnoe aýylynan 11-synyp oqýshysy Angelına Beloslýdseva ekochellendjder men qaldyqtardy bólek jınaý bastamasyn kóterse, Ýzýnkól aýdanynyń oqýshysy Arsenıı Bıbık "Meniń jaıly aýlam" baıqaýynyń jeńimpazy atandy.
Ekologıalyq tártip pen baqylaý baǵytynda "Eko Patrúl" volonterlik qozǵalysy belsendi jumys istep keledi. Olar 100-den astam nysandy tekserip, 71 zań buzýshylyq anyqtaǵan. Bul qozǵalysqa qoldaý retinde oblys basshylyǵy materıaldyq jáne tehnıkalyq kómek kórsetetinin málimdedi.
Sondaı-aq, birqatar aýyldar óz aýmaǵyn abattandyrýda belsendilik tanytyp otyr. Sarykól aýdanynyń Sorochınka aýylynda "Agro-Parasat" kompanıasy tek óz nysandaryn emes, búkil aýyldy kórkeıtip jatyr. Tobyl qalasynda 600-den astam tártip buzýshy ákimshilik jaýapkershilikke tartylǵan.
Jıyn sońynda oblys ákimi Qumar Aqsaqalov orman alqaptaryn damytý, chat-bot jumysyn jandandyrý, jastar men kásipkerlerdi keńinen tartý sıaqty naqty tapsyrmalar berdi. Mıchýrın orman alqabyn demalys orny retinde damytýǵa erekshe nazar aýdaryldy.
Qumar Aqsaqalovtyń aıtýynsha, shynaıy ekologıalyq mádenıet tek kúndelikti tájirıbege aınalǵanda ǵana qalyptasady.