Qazaqstan avıasıasy jańa kezeńge qadam basty
2025 jylǵy 9 shildesinde Almatydaǵy Azamattyq avıasıa akademıasynda (AAA) erekshe tarıhı oqıǵa boldy. Akademıaǵa alǵash ret Qazaqstanǵa resmı saparmen kelgen IKAO Keńesiniń Prezıdenti Salvatore Shakkıtano keldi. Bul sapar eldiń jahandyq áýe kóligi júıesindegi mańyzyn aıqyndady.
Sapar barysynda Salvatore Shakkıtano Akademıa basshylyǵymen, profesorlyq-oqytýshylar quramymen jáne stýdentterimen kezdesti. Ol óz sózinde Qazaqstannyń azamattyq avıasıany damytýdaǵy jetistikterin joǵary baǵalap, zamanaýı standarttardy engizýge, tıimdi memlekettik saıasat júrgizýge jáne adamı kapıtalǵa basa kóńil bólgeni úshin alǵysyn bildirdi. Onyń aıtýynsha, avıasıa — bul jaı ǵana ushý emes, adamdardy, mádenıetter men elderdi biriktiretin áleýmettik-ekonomıkalyq damýdyń qýatty quraly.
Shakkıtano myrza 2050 jylǵa qaraı jolaýshylar sanynyń 12 mıllıardqa jetetinin, kómirtekti beıtaraptyqqa kóshý, avıasıalyq qaýipsizdikti arttyrý jáne genderlik teńdikke qol jetkizý sıaqty mańyzdy syn-qaterlerdi atady. Áıelderdiń jahandyq avıasıadaǵy úlesi 5%-dan aspaıdy, biraq Qazaqstan bul baǵytta oń kórsetkishke ıe ekeni erekshe atap ótti.
Akademıada IKAO usynǵan CBTA (quzyrettilikke negizdelgen oqytý) modeli engizilgen. Munda pılottar, ınjenerler, dıspecherler men avıasıa menedjerleri ulttyq jáne halyqaralyq standarttarǵa sáıkes daıarlanady. Akademıa IKAO jáne IATA akredıtasıasyna ıe, sondaı-aq ALICANTO jáne TRAINAIR PLUS bastamalaryna qatysady. Budan bólek sheteldik seriktestermen birlesip avtorlyq kýrstardy ázirleýde.
Akademıa rektory Beken Seıdahmetov bul sapardy halyqaralyq ıntegrasıa men damý jolyndaǵy mańyzdy kezeń dep baǵalady. Akademıa bilim berý uıymy bolýmen qatar, IKAO-nyń óńirlik seriktesine aınalyp, avıasıalyq bilim berý salasyndaǵy jahandyq bastamalardy júzege asyrýǵa arnalǵan halyqaralyq platforma bolýǵa umtylady.
Sapar nátıjesinde Qazaqstannyń azamattyq avıasıasyn 2050 jylǵa deıin damytý jónindegi master-jospar rastaldy. Qujatta ınfraqurylymdy jańǵyrtý, sıfrlyq sheshimderdi engizý, kadr daıarlaý sapasyn arttyrý jáne Qazaqstandy Eýropa men Azıa arasyndaǵy tranzıttik hab retinde nyǵaıtý kózdelgen.
Sondaı-aq, avıasıalyq bilim berý salasynda ǵylymı-bilim berý klasterlerin qurý, sheteldik ýnıversıtettermen birlesken baǵdarlamalar men aǵylshyn tilindegi oqytý júıesin damytý máseleleri talqylandy.
Azamattyq avıasıa akademıasy azamattyq avıasıa salasyndaǵy halyqaralyq yntymaqtastyqty damytýǵa qosqan eleýli úlesi úshin IKAO Keńesiniń Prezıdenti Salvatore Shakkıtanoǵa jáne IKAO-nyń Eýropa jáne Soltústik Atlantıka búrosynyń (EUR/NAT) Óńirlik dırektory Nıkolas Ralloǵa «Azamattyq avıasıa akademıasynyń Qurmetti profesory» ataǵyn berdi.
Bul sapar — Qazaqstan men IKAO arasyndaǵy yntymaqtastyqtyń jańa kezeńge qadam basqanyn bildiredi. Endi ekijaqty baılanys tek formaldy deńgeıde emes, ornyqty avıasıalyq bolashaqqa baǵyttalǵan seriktestik deńgeıinde jalǵasady.