«Eńlik–Kebek» tragedıasynyń premerasy ótti.
Muhtar Áýezov atyndaǵy qazaq ulttyq drama teatrynda «Eńlik–Kebek» tragedıasynyń premerasy ótti. Qoıylymǵa memleket jáne qoǵam qaıratkerleri, QR Mádenıet jáne sport vıse-mınıstri Nurǵısa Dáýeshov qatysty. Spektákl Shákárimniń shyǵarmasy negizinde jazylǵan Muhtar Áýezovtiń týyndysy boıynsha sahnalandy.
Qoıylym taý bókterindegi abyzdyń el tynyshtyǵyn oılap, kúńirengen jyrlarymen bastalady. Budan keıin erke Eńlik pen ańǵal inisi Japal taý-tastyń arasynda án aıtyp júredi. Kenetten ań qýyp bara jatqan jigittiń daýysyn estip, Eńlik onyń oljasyn atyp túsiredi. Kebek pen Eńlik osylaı kezigip, bir-birine ǵashyq bolady.
Bir aptadan keıin sol taýdyń mańynda kezdesýge ýaǵdalasady. Degenmen, Eńlikteı sulýǵa Mataı rýynyń batyry Esen de sezimin bildiredi. Alaıda, Eńlik Esenge degen sezimi joq ekenin jetkizýge tyrysady. Osylaısha taýdyń eteginde mahabbat úshtigi kezdesip, batyrlar jekpe-jekke shyǵady. Eńlik batyrlarǵa toqtaý salyp, óz sózin aıtady. Osy kezde Eńliktiń sulý ǵana emes, erjúrek, sózge sheshen ekenin baıqaımyz.
Spektáklde Kebektiń rólin Ádilet Bazarbaıuly, Eńlikti Zahıra Rahymjan oınady. Qoıylymdy qarap otyryp, abyzdyń rólin Bekjan Turystyń sheber somdaǵanyn baıqaýǵa bolady. Ár sátinde eldiń tynyshtyǵyn saqtaýǵa tyrysady. Degenmen, taǵdyrdyń jazǵanynan eshkim de qutyla almaıdy. Qos ǵashyq Eńlik pen Kebek kúnderdiń bir kúninde qashyp ketedi.
Ekinshi bólimi Tobyqty rýyndaǵy halyqtyń mazasyzdyǵymen, «qarabet boldyq, uıatqa qaldyq» degen sózdermen bastalady. Arazdyqqa syltaý tabylyp, Esen Eńlikti daýlap, Tobyqty rýyna barady. Jaǵdaıdy sheshýge bıler keńesiniń otyrysy ótkiziledi. Mataı rýynyń daýyn daýlap Espenbet bı (róldi Bolat Ábdilmanov somdaıdy) sóz bastaıdy. Kóbeı bıdiń rólin Erlan Bilál oınaıdy. Tobyqtynyń atynan qos ǵashyqty aman saqtaýǵa, ornyna mal, baılyqpen almasýǵa sóz baılasady. Dese de, qara nıetti, qandyqol Esen batyr Eńlik pen Kebektiń ólimin tileıdi. Áıtpese, eki rýdyń arasyndaǵy jaýlastyq soǵysqa ulasatatyn habarlaıdy. Osylaısha Esen batyr rýlastaryn ertip, Eńlik pen Kebek tyǵylǵan úńgirdi tabady. Bul kezde eki ǵashyqtyń nárestesi dúnıege kelgen edi. Ólim jazasyna kesiler sátte Eńlikke úsh tilegin aıtýǵa ruqsat beriledi. Birinshi – Kebekpen qoshtasýyn, ekinshi – birge jerleýin, úshinshi – nárestesin aman alyp, Keńirbaı baıǵa tabystaýyn ótinedi. Bul tilektiń ekeýi oryndalady. Eńlik pen Kebek birge jerlenedi. Ekeýiniń óliminen keıin jartastaǵy bala joǵalyp ketedi. Spektákl osylaısha áserli aıaqtalady.
«Maǵan qoıylym unady. Sahna da óte jaqsy bezendirilgen. Qoıylymnyń ekinshi bólimi basqasha órbidi. Bıler keńesinde sóılegen sózderi birinen-biri ótedi. Beınebir bılerdiń ortasynda otyrǵandaı sezinesiń. Osyǵan qarap-aq qazaq aýyz ádebıetimizdiń murasy baı ekenin ańǵarýǵa bolady. Abaı atamyzdyń «Ǵashyqtyń tili – tilsiz til, Kózben kór de ishpen bil. Súıiser jastar qate etpes, Meıliń ılan, meıliń kúl» degen sózderi oıyma oraldy. Rasymen-aq, ǵashyqtar qaı zamanda bolmasyn óz mahabbatyna adal bolǵan. Qoıylymdy kórip otyryp óne boıym shymyrlaı jóneldi», – deıdi Ásel Rýzıbaı esimdi kórermen.