Artyq salmaqtan hırýrgıalyq jolmen arylǵysy keletinderdiń deni – 20-50 jas aralyǵyndaǵy áıelder.
Aq halattylar artyq salmaqtan óz betinshe aryla almaǵan jandardyń ómirine qaýip tónýi múmkin ekenin aıtýda, dep habarlaıdy Almaty-akshamy.kz Astanatv.kz-ke silteme jasap.
Aqtóbe medısına ortalyǵynyń hırýrg dárigeri Janádil Álmyrzaulynyń aıtýynsha, sońǵy kezde semizdikke shaldyqqandardyń ómirin saqtap qalý úshin jasalatyn operasıa kóbeıgen.
«Bul – emniń sońǵy satysy. Naýqas aldymen baqylaýǵa alynady. Jattyǵýlar men dıetalardyń kómegi bolmaǵan kezde emdik maqsatta operasıa jasalady. Qant dıabeti men semizdik birge júrgen ýaqytta adam ómirin saqtap qalýdyń bir joly bolyp sanalady. Jyldan-jylǵa artyq salmaqtyń aldyn alýǵa qarsy otalar kóbeıip barady. Ótken aptada artyq salmaǵy bar adamǵa ota jasaldy. Búgin taǵy sondaı naýqas ota ústeline keledi. Naýqasty emdeý maqsatynda jasaımyz. Artyq salmaq shamadan tys tamaqtaný, qozǵalystyń azaıýynan bolady», – deıdi hırýrg Janádil Álmyrzauly.
Aıtýynsha, el turǵyndarynyń 3-4 paıyzynda semizdik bar. Sońǵy úsh jylda elimizde semizdikti emdeýge arnalǵan qymbat operasıalar tegin jasalyp júr. Salmaǵyn hırýrgıalyq jolmen retteýge keletinderdiń deni – 20-50 jas aralyǵyndaǵy kelinshekter. Olar 150-160 kg deıin salmaq qosyp, qozǵalýy qıyndaǵan.
«Operasıa aqysyz. Naýqas birinshi tolyq tekserýden ótedi. Dıeta ustaıdy, fızıkalyq júktemelermen jattyǵý jasaıdy. Nátıje bolmaǵan jaǵdaıda, operasıa ústeline alamyz. Psıhologıalyq turǵydan daıyndalady. Asqazannyń úlken ıinin kesip alyp tastap, kishi ıin ǵana óńeshke jalǵanyp turady. Bul kezde asqazan trýbka tárizdes bolyp qalady. Az tamaqtanǵannyń ózinde birden toıǵandaı sezim bolady. Osylaısha salmaǵy azaıady. Adam ómirin saqtap qalý, emdeý ádisi retinde jasalǵan shara. Adamda artyq salmaq bolǵanda tize býyny aýyrady. Ota jasaǵannan keıin salmaǵy azaıyp, tize aýyrsynýy da ketedi», – deıdi hırýrg.
Aqtóbede 160 kelige deıin artyq salmaq qosyp, operasıa jasalǵandardyń eń jasy – 27 jastaǵy áıel adam.