Jaýyngerlik daıyndyq baǵdarlamasy qaıta qaraldy
Astanada general-polkovnık Rýslan Jaqsylyqovtyń tóraǵalyǵymen Qorǵanys mınıstrliginiń alqa otyrysy bolyp ótti. Onda Qarýly Kúshterdiń 2022 jylǵy jaýyngerlik daıyndyq qorytyndylary shyǵarylyp, aldaǵy jylǵa naqty tapsyrmalar qoıyldy. Óńirlik qolbasshylyqtar men ásker tekteriniń, quramalar men áskerı bólimderdiń basshylyq quramy alqa otyrysyna beınekonferensbaılanys rejıminde qatysty, dep habarlaıdy Almaty-akshamy.kz.
Qorǵanys mınıstri atap ótkendeı, ótken jyly qorǵanys vedomstvosy qyzmetiniń negizgi baǵyttary Memleket basshysynyń tapsyrmalaryn iske asyrý jónindegi is-sharalarǵa arnaldy. Onyń ishinde jaýyngerlik ázirlikti qoldaýmen qatar, áskerı qaýipsizdiktiń ózekti qaterlerin eskere otyryp, Qarýly Kúshterdiń qurylymy men quramyn jańǵyrtý, sıfrlyq tásilder arqyly áskerı basqarý júıesin jetildirý, armıany qazirgi zamanǵy joǵary tehnologıalyq qarý-jaraq pen áskerı tehnıkanyń úlgilerimen qaıta jaraqtandyrý, jaýyngerlik daıarlyqqa áskerlerdi qoldanýdyń jańa ádisterin engizý negizgi bolyp tabylady. Merıtokratıa qaǵıdaty negizinde áskerı bilim berý men kadr saıasaty júıesin damytý, jeke quramnyń kásibı deńgeıin arttyrý, áskerı qyzmetshilerdiń áleýmettik mártebesi men áskerı qyzmettiń bedelin arttyrý, sondaı-aq jastardy áskerı boryshyn ótkerýge yntalandyrý mańyzdy mánge ıe boldy.
– «Syrtqy kontýrdaǵy» ahýal kúrdeli. Sol sebepti biz qalyptasqan jaǵdaı men bıylǵy jyly qol jetkizgen nátıjeler negizinde Joǵarǵy Bas qolbasshynyń tapsyrmasyn anyq túsinip, jeke quramǵa naqty jetkizýge tıispiz. Eń bastysy, Úkimettiń keńeıtilgen otyrysynda Memleket basshysy atap ótkendeı, basshylyqta aldymyzǵa qoıylǵan mindetterdi sapaly ári tolyq oryndaýǵa qabiletti adamdar bolýy tıis, – dedi general-polkovnık Rýslan Jaqsylyqov.
2022 jyly qazirgi zamanǵy syn-tegeýrinder men qaýip-qaterlerge sáıkes Áskerı doktrınaǵa ózgerister engizildi. Qarýly kúshterdiń quramynda joǵary mobıldi jáne gıbrıdti soǵystar júrgizýge qabiletti arnaıy operasıalar kúshteri quryldy.
«Batyl Toıtarys – 2022», «Aıbalta-2022» jáne «Beket-2022» sıaqty aýqymdy oqý-jattyǵýlary barysynda kúshtik qurylymdarmen, ortalyq memlekettik jáne jergilikti atqarýshy organdarmen ózara is-qımyl pysyqtaldy. Qarýly kúshterdiń bólimsheleri halyqaralyq jattyǵýlarǵa qatysty. Olardyń kópshiligi bizdiń elimizdiń aýmaǵynda ótti.
Jaýyngerlik daıyndyq baǵdarlamasy qaıta qaraldy. Áskerı qyzmetshilerdi kezeń-kezeńmen daıarlaýdy jáne oqý kezeńinde bólimshelerdi úılestirýdi kózdeıtin jeke quramnyń jarty jyldyq jaýyngerlik oqý júıesi engizildi. Qazirgi zamanǵy qarýly qaqtyǵystardyń tájirıbesin, ushqyshsyz ushý apparattary men joǵary dáldiktegi qarýdy qoldanýdy eskere otyryp, áskerlerde jaýyngerlik is-qımyldardyń jańa taktıkalyq tásilderin ıgerý qolǵa alyndy.
Áskerler josparly túrde ozyq qarý-jaraqpen jáne basqarý júıelerimen jabdyqtalýda. Bıyl 170-ten astam áskerı tehnıka satyp alyndy. 100-ge jýyq áskerı tehnıka jóndeý men jańǵyrtýdan ótti.
Negizgi baǵyty qarý men oq-dárilerdi saqtaý qaýipsizdigin qamtamasyz etý bolyp tabylatyn áskerı ınfraqurylymdy damytý jalǵasýda. «Qaýipsiz el» ulttyq jobasy aıasynda zamanaýı áskerı qoımalar salý, sondaı-aq qolda bar nysandardy jetildirý uıymdastyryldy.
Áskerdiń barlyq salasyna, onyń ishinde áskerlerdi basqarý júıesine sıfrlyq tehnologıalardy engizýge erekshe nazar aýdaryldy. Áskerı mindettiler men áskerge shaqyrylýshylardyń esebi sıfrlyq formatqa kóshirildi. Bul óz kezeginde jergilikti áskerı basqarý organdarynyń jumysyn avtomattandyrýǵa múmkindik berdi.
Qorǵanys vedomstvosy áskerı qyzmetshilerdiń qaza bolýyn barynsha azaıtýǵa baǵyttalǵan «Ómirińdi SAQTA» baǵdarlamasyn ázirlep, iske asyrýda. Oǵan ortalyq memlekettik organdar men jurtshylyq keńinen tartylǵan.
Áskerı qyzmettiń qoǵamdaǵy bedelin arttyrýǵa baǵyttalǵan sharalar qabyldandy. «Jas sarbaz» áskerı-patrıottyq qozǵalysyna jastardy tartý jumysy jandandy. Qorǵanys mınıstrligi elimizdiń 50-den astam jetekshi joǵary oqý oryndarymen memorandýmǵa qol qoıdy. Osyǵan sáıkes, merzimdi áskerı qyzmetin ótkergen azamattar UBT-ny tapsyrmaı oqýǵa qabyldanady. Al úzdikterge tegin oqýǵa granttar beriletin bolady.
Qorǵanys vedomstvosynyń basshylyǵy áskerı qyzmetshilerdiń áleýmettik qamtamasyz etilýin jaqsartýdy nazardan tys qaldyrǵan emes. Memleket basshysynyń tapsyrmasyna sáıkes, 2021-2023 jyldary jeke quramnyń aqshalaı úlesin josparly túrde arttyrý júrgizilýde. 2023 jyly laýazymdyq jalaqynyń 3 jyldaǵy jalpy ósýi 2020 jylǵy mólsheriniń 60 paıyzyn quraıdy.
Budan ózge, Parlament Májilisiniń Halyqaralyq ister, qorǵanys jáne qaýipsizdik komıtetiniń depýtattary Qorǵanys mınıstri general-polkovnık Rýslan Jaqsylyqovtyń Otan aldyndaǵy boryshty óteýde ortaq mindetterdi oryndaıtyn áskerı qyzmetshiler men kúshtik qurylymdar qyzmetkerleriniń aqshalaı úles mólsherin teńestirý týraly bastamasyn qoldady. Medısına qyzmetkerleriniń, áskerı oqý oryndary oqytýshylarynyń jáne jalpy azamattyq personaldyń jalaqysyn arttyrý boıynsha jumys júrgizilip jatyr.
Alqa otyrysynda áskerı tártip pen quqyqtyq tártip, sybaılas jemqorlyqqa qarsy qyzmet máseleleri qaraldy. Ótken jylmen salystyrǵanda, áskerı qyzmetshilerdiń qaza bolý jaǵdaılarynyń 21 paıyzǵa, áskerı qylmystardyń, onyń ishinde qol jumsaýdyń 26 paıyzǵa, ákimshilik quqyq buzýshylyqtardyń 46 paıyzǵa tómendeýi baıqaldy. Sybaılas jemqorlyq qylmystar sany eki esege jýyq (44%) qysqardy.
Jyl qorytyndysy boıynsha barlyq qurylymdyq bólimshelerge jalpy qyzmet nátıjelerine sáıkes baǵa berildi. Atap aıtqanda, ásker túrleri arasynda Qurlyq áskerleri, óńirlik qolbasshylyqtar men ásker tekteri boıynsha Desanttyq-shabýyldaý áskerleri, quramalar men áskerı bólimderdiń ishinde 38-desanttyq-shabýyldaý quramasy úzdik atandy.
Alqa otyrysynyń qorytyndysynda aldaǵy 2023 jylǵa mindetter qoıyldy. Qorǵanys mınıstri barlyq laýazymdy tulǵalar qyzmetiniń tıimdiliginiń basty ındıkatory retinde eldiń qorǵanys qabiletin qamtamasyz etý úshin ótkiziletin is-sharalardyń praktıkalyq mańyzdylyǵyn aıqyndady.
Basty nazar maqsaty boıynsha mindetterdi oryndaýda jeke quramnyń, qarý-jaraq pen áskerı tehnıkanyń materıaldyq quraldardyń daıyndyǵyna baǵyttalatyn bolady. Jaýyngerlik daıarlyq baǵytynda kúsh-jigerdi áskerı qaýipsizdikke, qazirgi zamanǵy qaterler turǵysynan áskerı qyzmetshilerdi oqytý sapasyna, oqý-materıaldyq bazany jetildirýge jumyldyrý kerek.
Kúndelikti jáne oqý-jaýyngerlik qyzmetti uıymdastyrý prosesinde taktıkalyq basqarý býyny retinde komandırlerge kóbirek derbestik berý, olardyń kez kelgen jaǵdaıda sheshim qabyldaý qabiletin damytý qajet ekendigi atap ótildi.
Budan ózge, shalǵaıdaǵy garnızondarda qyzmet ótkerip jatqan áskerı qyzmetshilerdiń áleýmettik ál-aýqatyn jaqsartý jónindegi sharalar kesheni josparlanǵan. Ol úshin múddeli ortalyq memlekettik organdar men kúshtik qurylymdardy tarta otyryp, júıeli jumys uıymdastyrylatyn bolady.