Elimizde taǵy 20 polıgon salý josparlanyp otyr
QR Premer-Mınıstri Álıhan Smaıylovtyń tóraǵalyǵymen ótken Prezıdent janyndaǵy «Jasyl ekonomıkaǵa» kóshý jónindegi keńestiń otyrysynda komýnaldyq qaldyqtardy basqarý tıimdiligin arttyrý jáne turǵyn úı sektorynda, ónerkásipte jáne basqa da salalarda energıa únemdeý tehnologıalaryn engizý jónindegi josparlar qaraldy, dep habarlaıdy Almaty-akshamy.kz.
Ekologıa, geologıa jáne tabıǵı resýrstar mınıstri Serikqalı Brekeshev bıylǵy jyldyń úshinshi toqsanynda respýblıka boıynsha qatty turmystyq qaldyqtardy qaıta óńdeý úlesi 24%-dy quraǵanyn baıandady. Bul kórsetkish jyl saıyn artyp keledi (2020 – 18%, 2021 – 21%) jáne 2025 jylǵa qaraı 30%-dan asýy kerek.
Onyń aıtýynsha, búginde elimizde 3 005 QTQ polıgony jumys isteıdi, budan bólek Abaı, Aqmola, Aqtóbe, Atyraý, Shyǵys Qazaqstan, Batys Qazaqstan jáne Pavlodar oblystarynda taǵy 20 polıgon salý josparlanyp otyr. Ártúrli kezeńderde qoqysty bólip jınaý 142, al suryptaý 101 eldi mekende engizildi.
Premer-Mınıstr qoldanystaǵy polıgondardyń ishinde tek 630-ǵa jýyǵy ǵana (21%) ekologıalyq jáne sanıtarlyq normalarǵa saı ekenin atap ótti. Sondaı-aq Úkimet basshysy jylyna 4-4,5 mln tonna turmystyq qaldyqtar jınalatynyn, alaıda jergilikti atqarýshy organdar qoqys jınaý jumysyn tıisti deńgeıde uıymdastyra almaı otyrǵanyn aıtty.
«Bul úrdis stıhıalyq polıgondardyń paıda bolýyna alyp keledi, olardy joıý úshin búdjet qarajaty jumsalady. Atap aıtqanda, qurylys qaldyqtaryn qaıta óńdeýge arnalǵan ınfraqurylym Qostanaı oblysy men elordada ǵana uıymdastyrylǵan. Qalǵan aımaqtarda ondaı ınfraqurylym joq», — dedi Álıhan Smaıylov.
Premer-Mınıstr ákimdikterge 2023 jylǵy 1 maýsymǵa deıin barlyq ruqsat etilmegen polıgondardy joıýdy jáne jalpy polıgondardy ekologıalyq jáne sanıtarlyq normalarǵa sáıkestendirý jumystaryn jedeldetýdi tapsyrdy.
Sonymen qatar Premer-Mınıstr qaldyqtardyń barlyq túrin qaıta óńdeýdi yntalandyrý, 5 000-nan 10 000 adamǵa deıin turatyn eldi mekender úshin polıgondardyń úlgilik jobalaryn ázirleýdi jedeldetý, sondaı-aq jańa Qala qurylysy kodeksi aıasynda qurylys qaldyqtarynyń aınalymy jónindegi normany qarastyrý qajettigin atap ótti.
Energıa únemdeý jáne energıa tıimdiligin arttyrý máseleleri boıynsha ındýstrıa jáne ınfraqurylymdyq damý mınıstri Qaıyrbek Óskenbaev baıandady.
Ol «Jasyl ekonomıkaǵa» kóshý jónindegi tujyrymdamaǵa sáıkes, 2030 jylǵa qaraı ekonomıkada energıanyń jumsalýyn 30%-ǵa (2008 jylǵy deńgeıden) tómendetý josparlanyp otyrǵanyn atap ótti. Osyǵan baılanysty kóp páterli turǵyn úılerdiń, áleýmettik obektilerdiń, ónerkásip kásiporyndarynyń jáne kólik ınfraqurylymynyń energıa tıimdiligin arttyrý jónindegi sharalardy iske asyrý kózdelip otyr. Mınıstrdiń aıtýynsha, basqarýdyń, energomenedjmenttiń avtomattandyrylǵan júıeleri engiziledi, arnaıy qurylǵylar ornatylyp, jabdyqtar aýystyrylady.
Premer-Mınıstr bul tásilderdi qoldap, turǵyn úı sektoryna birinshi kezekte nazar aýdarý qajettigin atap ótti.