Jalpy bilim beretin mektepterde Keńes Odaǵynyń Batyry, №1 Halyq qaharmany, táýelsiz Qazaqstannyń tuńǵysh Qorǵanys mınıstri armıa generaly Saǵadat Nurmaǵambetovtyń ǵasyrlyq mereıtoıyn merekeleýge arnalǵan biryńǵaı saǵat ótti.
İs-shara mınıstrlikterdiń balalar men oqýshylarǵa áskerı-patrıottyq tárbıe berý jónindegi birlesken jumys jospary sheńberinde ótkizildi, dep habarlaıdy Almaty-akshamy.kz Qorǵanys mınıstrligine silteme jasap.
Bıyl elimiz dańqty batyrlary Saǵadat Nurmaǵambetovtyń (25 mamyr) jáne Raqymjan Qoshqarbaevtyń (19 qazan) týǵanyna 100 jyl tolýyn atap ótýde. El prezıdenti Qasym-Jomart Toqaev óziniń suhbattarynyń birinde "El tarıhynda iz qaldyrǵan adamdardy qurmetteý jalpyulttyq biregeılikti nyǵaıtý turǵysynan óte mańyzdy" dep atap ótken bolatyn.
Qaraǵandy oblysynyń Prıozersk qalasyndaǵy № 1 mektepte "Ańyz adam" erlik sabaǵy uıymdastyryldy. "Jas zeńbirekshi" áskerı-patrıottyq klýbynyń tárbıelenýshileri men oqýshylarǵa "Qarýly kúshterdiń ardagerleri" RQB jergilikti fılıalynyń tóraǵasy Tilek Kenjebekov, 60601 áskerı bólim komandıriniń orynbasary podpolkovnık Nurdos Qalymbetov, 06708 áskerı bólimi komandıri orynbasarynyń mindetin ýaqytsha atqarýshy kapıtan Syrym Berdali, Prıozersk garnızony áskerı polısıa bólimshesiniń áskerler qyzmeti jónindegi ofıseriniń mindetin ýaqytsha atqarýshy aǵa serjant Qanat Ashnazarov jáne Prıozersk qalalyq kitaphanasynyń kitaphanashysy Indıra Talhanbaeva armıa generaly Saǵadat Nurmaǵambetovtyń erlik joly týraly aıtty.
Saǵadat Nurmaǵambetovtyń ekinshi dúnıejúzilik soǵys jyldaryndaǵy jaýyngerlik joly men áskerı qolbasshy retindegi qyzmeti týraly Astana qalasyndaǵy Jumabek Táshenev atyndaǵy №10 mektep-gımnazıasynyń oqýshylary kóptegen tanymdyq aqparatqa qanyqty.
"Búgin biz 7 g jáne 9 j synyptarynda aty ańyzǵa aınalǵan áskerı qolbasshy Saǵadat Nurmaǵambetovtyń júz jyldyq mereıtoıyna arnalǵan sabaq ótkizdik. Bizdiń mektepte oqýshylarǵa patrıottyq tárbıe berý keshendi túrde ótkizilip turady. Buǵan AÁD sabaqtary, gýmanıtarlyq pánderdiń mazmuny jáne ártúrli synyptan tys jumystar yqpal etedi. Olardyń barlyǵy óskeleń urpaqtyń boıynda azamattyq, jaýapkershilik jáne Otandy qorǵaýǵa daıyn bolý sezimin qalyptastyrýǵa baǵyttalǵan", – dedi bastapqy áskerı daıyndyq pániniń oqytýshysy, áskerı-patrıottyq isti uıymdastyrýshy zapastaǵy 1-synypty serjant Tólegen Qamzın.
Erlik sabaǵynda oqýshylarǵa Saǵadat Nurmaǵambetov týraly derekti fılm kórsetildi.