«Jas maman» jobasy
Memleket basshysy Qazaqstan halqyna Joldaýynda 2025 jyldy Jumysshy mamandyqtary jyly dep jarıalap, kásiptik bilim berýdi reformalaýdyń, qajyrly eńbek pen kásipqoılyq ıdeıasyn nasıhattaýdyń mańyzdylyǵy týraly aıtty.
Bizdiń Týrızm jáne qonaqjaılylyq ındýstrıasy kolejiniń negizgi mindeti – jumys berýshilerge, qoǵamǵa jáne memleketke qajetti mamandyqtar men kásipter boıynsha, eńbek naryǵynyń talaptaryna saı bilikti mamandar daıarlaý.
Týrızm men qonaqjaılylyq ındýstrıasynyń údemeli damýy – qazirgi zamannyń eń jarqyn qubylystarynyń biri. Qyzmet kórsetý salasy ulttyq búdjetke qosqan úlesi jaǵynan da, onda jumyspen qamtylǵandar sany jaǵynan da basymdyqqa ıe bolyp otyr. Qazirgi ekonomıkadaǵy qyzmet kórsetý salasynyń mańyzy únemi artyp keledi, bul qonaqúı kásiporyndaryn basqarýdyń jańa tásilderin ázirleýge jáne osy uıymdar qyzmetkerleriniń kásibı deńgeıin arttyrýǵa baılanysty kóptegen maqsat-mindetterdiń týyndaýyna alyp keledi. Stýdentterdiń kásibı ortaǵa ıntegrasıalanýy mańyzdy.
Bul rette áleýmettik seriktestermen Almaty qalasynyń jetekshi kásiporyndarynda kásibı tájirıbeden ótý týraly 300-den astam kelisim-sharttardyń jasalýy túlekterimizdiń kásibı biliktiligin arttyrýǵa yqpal etedi. Osy oraıda, mamandar daıarlaýda Qazaqstandyq qonaqúıler men meıramhanalar qaýymdastyǵy (QQjMQ), Qazaqstannyń týrısik qaýymdastyǵy (QTA), Qazaqstan taǵam kásiporyndarynyń odaǵy, «Qumbel mádenı-áleýmettik jáne bilim berýdi damytýdyń Qazaqstandyq qory» BQB, taǵy basqa da áleýmettik seriktestikterimizdiń rólin atap ótkim keledi jáne olarmen yqpaldastyqtyń arqasynda kolej ómiri jandana bastady.
2022 jyldan bastap kolejde «Jas maman» jobasy aıasynda ashylǵan «Qonaqjaılylyq ındýstrıasy» quzyrettilik ortalyǵy jumys isteıdi. Ortalyq kásibı quzyrettilikterdi, jańa tehnologıalyq sheshimderdi jáne zamanaýı kásibı daǵdylardy damytýǵa yqpal etedi. Sonymen qatar, ortalyqtyń bazasynda kásibı baıqaýlar men halyqaralyq chempıonattarǵa daıyndalý úshin oqý-jattyǵý lagerleri jumys jasaýda.
Kolejdiń oqý-tájirıbelik sheberhanalary tabysty jumyspen qamtylýǵa yqpal etetin kásibı daǵdylar men qabiletterdi tájirıbede qoldanýǵa múmkindik beretin zamanaýı ınovasıalyq jabdyqtarmen jabdyqtalǵan.
Kásiptik-tehnıkalyq bilim berý júıesin transformasıalaý jáne Jumysshy mamandyqtar jylyn ótkizý aıasynda kolejde jumysshy mamandyqtarynyń bedelin, kadrlar daıarlaý sapasyn arttyrýǵa, jumys berýshilermen ózara qarym-qatynas jasaýdy keńeıtýge yqpal etetin is-sharalar josparlanǵan.
Zamanaýı postındýstrıaldy qoǵam oqý ornynyń básekege qabiletti túlegin daıyndaýǵa jańa talaptar qoıady. Qonaqjaılylyq ındýstrıasy túrli pánder boıynsha ózekti teorıalyq jáne praktıkalyq bilimmen qarýlanǵan jáne bıznesti júrgizýdi jaqsy meńgergen jas mamandardy qajet etedi.