Jylý ortalyǵynyń dırektory «máseleni mekeme emes, turǵyndardyń ózi sheshýi kerek» degen jaýap aıtty.
«Jylý berilse de, úıdiń ishi azynap turady». Osylaı degen Qonaev qalasynyń turǵyndary jylýǵa jarymaı otyr. Ýájin aıtqan jurttyń sózine sensek, másele birneshe ret kóterilse de, sheshimin tappaǵan, dep habarlaıdy Almaty-akshamy.kz Almaty.tv-ge silteme jasap.
Valentına Hodenko Qonaev qalasynda 20 jyldan beri turady. Onyń aıtýynsha, páterdegi aýa temperatýrasy 18 gradýstan aspaıdy.
«Oblys ortalyǵy atanyp, másele sheshiledi dep oıladyq. İs júzinde olaı bolmady. Ákimdikke talaı bardyq. Olar qurǵaq ýáde berip, shyǵaryp salady. Eshteńe ózgermedi», – deıdi Qonaev qalasynyń turǵyny Valentına Hodenko.
Búrseń qaǵyp otyrǵan ózge turǵyndardyń aıtýynsha, jylý júıesindegi aqaý saldarynan páter azynap turady. Óıtkeni, ystyq sý kelip tursa da, úıdegi batareıalar sýyq. Al jylý ortalyǵynyń dırektory «máseleni mekeme emes, turǵyndardyń ózi sheshýi kerek» degen jaýap aıtty.
«Bul – betonnan salynǵan úıler. Terezesin aýystyrý kerek. Esikti qaptaý kerek. Sonyń bárin qamtamasyz etetin úıdiń ıesi. Jylý ortalyǵynan sanıtarlyq normaǵa saı jylý berilip otyr. Biz 80-85 gradýsqa deıin jylý berýge múmkindigimiz bar. Biraq normadan asyrsaq, olardyń qubyry jarylyp ketedi», – dedi Qonaev qalasy jylý ortalyǵynyń dırektory Seıdahmet Dadambekov.
Ortalyq dırektory «turǵyn úılerdegi qubyrlardy da tazalaý kerek» deıdi. Sózine sensek, bul jumystardy páter ıeleri kooperatıvi baqylaýǵa alýy tıis.