Almaty – Qazaqstandaǵy qoldanbaly ónerdiń mádenı brendine aınaldy
Almatylyq qolónershiler halyqaralyq arenaǵa shyqty. Byltyr qalaǵa «Álem qolónershileriniń qalasy» degen mártebe berilgennen keıin, qazaqstandyq sheberlerdi TMD elderinen bólek, Eýropa men Azıa elderi de moıyndaı bastady. Olardyń qolynan shyqqan buıymdar búginde qazaq mádenıetiniń kórinisi retinde qabyldanyp, olar ótkizetin jármeńkeler – týrıserdi tartatyn, ekonomıkany alǵa súıreıtin kúshke aınalyp barady. Bul týraly Almatynyń Óńirlik komýnıkasıalar qyzmetinde ótken baspasóz konferensıasynda Almaty qolónershiler palatasynyń vıse-prezıdenti Dámeli Janasheva málimdedi.
2024 jyldyń sońyna taman Almaty Qolóner jónindegi Álemdik keńestiń (WCC) sheshimimen qolóner men qazaqtyń ulttyq mýzykalyq aspaptary baǵyty boıynsha Dúnıejúzilik qolónershiler qalalarynyń tizimine endi. Bul jańalyq qazaqstandyq sheberlerdiń jumysyna jańa serpin berip, almatylyq ónimge sheteldik naryqta suranysty arttyrdy.
Almatylyq qolónershiler óz ónimderin álemdik jármeńkelerde usynýǵa múmkindik aldy. Qolóner sheberleriniń jármeńkeler men festıválderge turaqty qatysyp júrgeni de kópshiliktiń nazaryn aýdarýda. Byltyr Almatyda 1300-ge jýyq qolóner sheberi qatysqan 17 jármeńke ótkizilgen.
2014 jyldan beri jumys isteıtin Qolóner jónindegi Álemdik keńeske búginde dúnıejúziniń 60 qalasy kiredi. Bul júıege Qazaqstan alǵash ret Taraz qalasynyń kıiz óńdeý salasyndaǵy tájirıbesiniń arqasynda qosylǵan bolatyn.
Almaty bolsa halqymyzdyń ulttyq jáne mádenı kodyn ulyqtaıtyn – qolóner men qazaqtyń ulttyq aspaptary baǵytyn tańdady.
2024 jyldyń tamyz aıynda Kýveıt, Qytaı, Ózbekstan jáne Qazaqstan ókilderinen quralǵan WCC halyqaralyq komısıasy Almatyǵa arnaıy saparmen keldi. Úsh kún boıy olar zergerlik sheberhanalar men mýzykalyq aspaptar jasaıtyn stýdıalardyń jumysymen tanysyp, buıymdardyń sapasy men tabıǵı shıkizatty qoldaný tásilderine erekshe nazar aýdarǵan. Sapardyń qorytyndysy boıynsha jeke jáne jalpy esep daıyndalyp, 2024 jyldyń qarashasynda Almatyǵa resmı túrde World Craft City mártebesi berildi. Osylaısha, qala álemdik qolóner kartasynda óz ornyn aldy. Bul mártebe Almatynyń týrısik jáne mádenı tartymdylyǵyn arttyryp, sheberlerdiń týyndylaryna degen ishki jáne syrtqy suranysty kúsheıtti.
«Qazaqstandyq qolónerdiń halyqaralyq deńgeıde moıyndalýy – sheberlerimizdiń buıymdaryn ulttyq brendke aınaldyrýǵa jol ashty. Basqa elderde jármeńkeler kóbine kádesyı ónimderin satý úshin uıymdastyrylsa, Almatyda qoldan jasalǵan kıim, aıaq kıim, bas kıim, ydys-aıaq, mýzykalyq aspaptar men sándik buıymdardyń alýan túri bar», – dedi Dámeli Janasheva.
Qazir aıyna eki ret ótetin Almaty jármeńkesine kelýshiler sany artyp keledi. Ár jármeńkege orta eseppen 80–100 sheber qatysady, al bir jylda bul kórsetkish 1300-den asady. Almaty qolónershiler palatasy jas sheberlerge qoldaý kórsetip, profıldik kolejder men joǵary oqý oryndarynyń stýdentterine jármeńkege qatysýǵa múmkindik beredi. Sondaı-aq marketıń, áleýmettik jelilerde alǵa jyljý jáne bıznesti júrgizý boıynsha keńes beredi. Óz isin endi bastaǵan erekshe sheberlerge jármeńkege tegin oryn usyný da – osy palata jumysynyń bir bóligi.