Energetıka mınıstri Erlan Aqkenjenov Halyqaralyq valúta qory (HVQ) mısıasymen jumys kezdesýin ótkizdi. Mısıany Qazaqstan boıynsha jańadan taǵaıyndalǵan jetekshi – Alı Al-Eıd myrza bastap keldi.
Kezdesý barysynda eldiń energetıka salasyndaǵy ınvestısıalyq klımatty nyǵaıtý joldary, jylý elektr ortalyqtaryn qosa alǵanda, ınfraqurylymdy aýqymdy jańǵyrtý josparlary jáne munaı-gaz salasynyń damý perspektıvalary talqylandy.
Erlan Aqkenjenov Qazaqstan energetıkasyndaǵy basymdyqtardy aıqyndap, ınvestorlar úshin ashyq ári qolaıly jaǵdaılar jasaýdyń mańyzdylyǵyn atap ótti.
"Halyqaralyq seriktestermen, sonyń ishinde HVQ-men júrgiziletin konstrýktıvti dıalog bizge energetıka salasyn ornyqty damytý strategıasyn tıimdi júzege asyrýǵa jáne úzdik álemdik tájirıbelermen úndestirýge múmkindik beredi", – dedi mınıstr.
Kezdesýdiń negizgi taqyryptarynyń biri - jumys istep turǵan energetıkalyq qýattardy jańǵyrtý baǵdarlamalary boldy. Ásirese, jylý elektr ortalyqtaryn jańartý máselesine erekshe nazar aýdaryldy. Bul – senimdi energıamen qamtýdy qamtamasyz etý jáne zamanaýı, ekologıalyq taza tehnologıalarǵa uzaq merzimdi ınvestısıa tartý úshin mańyzdy negiz bolyp tabylady.
Taraptar munaı-gaz sektorynyń damý keleshegin de egjeı-tegjeıli qarastyrdy. Mınıstr 2027 jylǵa qaraı munaı óndirý kólemi 104,5 mln tonnaǵa jetedi degen boljamdy rastady. Bul kórsetkishke Teńiz ken ornyn keńeıtý sıaqty iri jobalardy iske asyrý arqyly qol jetkizilmek.
Kezdesý barysynda jańartylatyn energıa kózderi sektoryna ınvestısıa tartý máseleleri de sóz boldy. Qazaqstan 2030 jylǵa qaraı jańartylatyn energıa kózderiniń úlesin eldiń energetıkalyq teńgeriminde 15%-ǵa deıin jetkizýdi maqsat etip otyr.
"Basty mindetimiz - eldiń energetıkalyq qaýipsizdigin qamtamasyz etý jáne ınvestısıalar tartý men ozyq tehnologıalardy engizý arqyly salanyń qarqyndy damýyna jaǵdaı jasaý. Qazaqstan ózara tıimdi yntymaqtastyqqa árdaıym ashyq", – dedi Erlan Aqkenjenov kezdesý qorytyndysy boıynsha.