Qurbandyqqa shalynatyn maldyń túrleri men jasyna qatysty talaptar bar. Qurbandyqqa qoı, sıyr, eshki, túıe ǵana shalynady. Qoı men eshkiniń jasy 1 jastan, sıyr 2 jastan, túıe 5 jastan asýy tıis. Qoı – bazardaǵy eń etti usaq maldardyń biri. Onyń salmaǵy shamamen 30 kelige jýyqtaıdy. Nur kz saıtynyń jazýynsha, qoı baǵasy 70 myń teńgeden asady.
"Baǵa kóteriledi. Qulaǵy, basy bútin, jasyna tolǵan mal. Eshqandaı ýaıymsyz qurban shalýǵa jaramdy. Baǵasy 80-85 myń teńge turady. Toqtylardyń baǵasy 50-55, 60-65 teńgeniń arasynda satylyp jatyr", – dedi satýshy Mustafa Mazamov.
"Mal soıǵanda qoıdyń deni saý bolýy kerek, kózi soqyr, aıaǵy aqsaq, qulaǵy kesilmeýi kerek. Ár basty 3 myń, iri qarany 7-8 myń teńgege soıylady", – dedi qasapshy Álimbek Sapaev.
Qazirdiń ózinde bazarlarda qyzý daıyndyq baıqalady. Qurban shalýǵa nıettengen jurt mal tańdap, tapsyrys berip jatyr.
"Astana qalasyndaǵy mal bazarynan qoı alyp, qurbandyqqa shalyp, sadaqa berip jatyrmyz. Baǵalary kóńilimizden shyqty", – dedi qala turǵyny Indıra Seıitjanqyzy.
Aıta keteıik, byltyr 40 myń 778 mal qurbandyqqa shalynyp, 131 et qabyldaý pýnktine jınalǵan et 137 myńǵa jýyq otbasyǵa jetkizilgen. Al bıyl elimiz boıynsha 60 orynda qurban shalý rásimi ótedi.