Almatyda jylý jelilerin qaıta jańǵyrtý sebebinen eki kóshemen qozǵalys shekteledi, - dep habarlaıdy aqshamnews.kz tilshisi.
Almatyda aldaǵy jylytý maýsymyna daıyndyq aıasynda óz normatıv merzimin ótep bolǵan jylý jelilerin aýystyrý jumystary júrgizilip jatyr. Soǵan baılanysty qalanyń Almaly aýdanynda kóshelerdiń eki ýchaskesinde avtokólikter qozǵalysy ýaqytsha shekteledi.
3 maýsymnan bastap 6 shildege deıin Almatynyń Almaly aýdanynda avtokólikter qozǵalysy shekteledi: Áıtıev kóshesimen Bógenbaı batyr kóshesinen bastap Tóle bı kóshesine deıin (eki baǵytta); Qazybek bı kóshesimen Shókın kóshesinen bastap Isaev kóshesine deıin (eki baǵytta).
Ýaqytsha shekteýler kórsetilgen kóshe segmentteriniń júrgin bóliginiń astymen ótetin magıstraldyq qubyrjoldardy jańǵyrtý boıynsha josparly jumystardyń qaýipsizdigin qamtamasyz etý úshin engiziledi.
Jalpy, bıyl bul obektilerde 1978-1989 jyldary paıdalanýǵa engizilgen, jalpy uzaqtyǵy 1 kılometrdi quraıtyn jylýmen jabdyqtaý jelilerin aýystyrý josparlanyp otyr. Bul 13 kóppáterli úıdiń turǵyndaryn qys mezgilinde turaqty jylýmen jabdyqtaýdy qamtamasyz etýge múmkindik beredi.
Bıyl qala boıynsha 39 km jylý trassasyn jańǵyrtý josparlanǵan. Bul tozý deńgeıin 54% deıin azaıtýǵa múmkindik beredi.
Eskertemiz, qozǵalystardy shekteýge qatysty barlyq aqparat Almaty.kz saıtynda, @AlmatyJoly Telegram-arnasynda, aýdandyq ákimdikter men basqarmalardyń áleýmettik jelilerinde, sondaı-aq "2GIS" jáne "Iandeks kartalar" servısterinde ornalastyrylǵan.