Qazaqstan Respýblıkasynyń Prezıdenti Qasym-Jomart Toqaev Qazaqstan halqy Assambleıasynyń HHHİV sesıasynda sóılegen sózinde elimizdegi qoǵamdyq-saıası ózgeristerge, jańa sana men ádiletti qoǵamǵa kóshý úderisine keńinen toqtaldy. Ol qoǵamdyq kelisim men Assambleıanyń róline jańasha qaraý qajettigin atap ótti. Bul týraly Aqshamnews.kz saıty habarlaıdy.
Memleket basshysy sońǵy jyldary Qazaqstanda úlken ózgerister oryn alǵanyn aıtty. Ekonomıkalyq jáne saıası reformalar júzege asyrylyp, halyqtyń qoǵamdyq-saıası oqıǵalarǵa kózqarasy túbegeıli jańarǵan.
"Biz zamanaýı jáne aldyńǵy qatarly qoǵamǵa aınaldyq. Munyń bári bizdegi qoǵamdyq kelisim úlgisine de tyń talaptar qoıady. Keshe ǵana tıimdi sanalǵan ádis-tásilder búgin jaramsyz bolýy múmkin", – dedi Toqaev.
Prezıdent qoǵamdaǵy ózgeristerge laıyqty túrde jaýap berý úshin, Assambleıa qyzmetiniń máni men mazmunyn qaıta qaraý qajettigin usyndy.
"Assambleıa memlekettiń etnosaralyq saladaǵy barlyq jumysyna baǵyt beretin strategıalyq shtabqa aınalýy kerek", – dedi ol.