Qazaqstan Prezıdenti Qasym-Jomart Toqaev Qazaqstan halqy Assambleıasynyń HHHİV sesıasynda sóılegen sózinde QHA qyzmetiniń keleshektegi basty baǵyttaryn atap ótti. Ol Assambleıanyń aımaqtardaǵy jumysyn jandandyrý, mádenıet pen óner arqyly ulttyq birlikti nyǵaıtý, sondaı-aq etnosaralyq tatýlyqty odan ári tereńdetý qajettigin basa aıtty. Bul týraly Aqshamnews.kz saıty habarlaıdy.
Prezıdent eń aldymen Assambleıanyń óńirlerde belsendi bolýyn tapsyrdy. Ol byltyr Túrkistan qalasynda ashylǵan jańa Dostyq úıiniń mańyzyn atap ótti.
"Endi osyndaı Dostyq úıin halyq tyǵyz qonystanǵan Almaty oblysynda salý qajet. Bul ǵımarat aımaqtyń qoǵamdyq ómiri úshin óte mańyzdy ortalyq bolmaq", – dedi Toqaev.
Sonymen qatar Qordaı, Uıǵyr, Saıram, Panfılov sıaqty etnostar tyǵyz shoǵyrlanǵan aýdandarda Assambleıa qurylymdaryn ashý qajettigin aıtty. Prezıdenttiń sózinshe, bul bastama qoǵamdyq kelisimdi tereńdetýge jáne jergilikti deńgeıde birlik saıasatyn tıimdi júrgizýge sep bolady.
"Dostyq úıleri taǵy birneshe qala men aýdan ortalyǵynda ashylady dep josparlanyp otyr. Men bul bastamany qoldaımyn", – dedi ol.
Memleket basshysy ulttyq birlikti nyǵaıtýda mádenıet pen ónerdiń áleýetin tolyq paıdalaný kerek ekenin aıtty. Onyń pikirinshe, ártúrli etnostardyń mádenı murasy — Qazaqstan mádenıetiniń ajyramas bóligi.
"«Birligimiz – áralýandyqta» qaǵıdatyn júzege asyrý úshin mádenıet pen ónerdiń áleýetin tolyq paıdalanǵan durys", – dep atap ótti Prezıdent.
Ol elimizde ornalasqan Aleksandr Pýshkın, Taras Shevchenko, Fedor Dostoevskıı, Mıhaıl Sholohov syndy uly tulǵalarǵa arnalǵan mýzeılerdiń Qazaqstan mádenıetiniń baı qoryn tolyqtyryp otyrǵanyn aıtty. Bul mýzeılerdiń ekspozısıalaryn Astana men Almaty qalalarynda uıymdastyryp, kópshilikke tanytý mańyzdy.
Sonymen birge, keıbir etnomádenı birlestikter jınaǵan óner týyndylary men etnografıalyq jádigerler de ulttyq muraǵa aınalýǵa laıyq ekeni atap ótildi.
Qasym-Jomart Toqaevtyń Qazaqstan halqy Assambleıasy sesıasynda kótergen bastamalary – el ishindegi qoǵamdyq kelisim men ulttyq tutastyqty saqtaý jolyndaǵy naqty qadamdar. Óńirlik jumysty kúsheıtý, mádenı murany keńinen nasıhattaý jáne etnosaralyq dıalogty tereńdetý – Assambleıa aldynda turǵan strategıalyq mindetter retinde belgilendi.