Almatyda Qalalyq keńestiń - qurylys, energetıka, sýmen qamtamasyz etý sıaqty eń ózekti máselelerge baılanysty jumysy jalǵasyp jatyr.
№2 komısıanyń tóraǵasy Gúlmıra Baıǵabylova óńirlik komýnıkasıalar qyzmetinde ótken pres-konferensıa kezinde osylaı dedi, dep habarlaıdy aqshamnews.kz.
Onyń aıtýynsha, komısıa monıtorıń jasap, dóńgelek ústelder ótkizip, qala ákimdigi men oǵan qarasty mekemelerge 600-den astam usynys jasaǵan. 70% qysqamerzimdik, 50% uzaqmerzimdik sheshim qabyldap, ony oryndaýǵa kirisken.
Spıkerdiń aıtýynsha, qala qurylysyna qatysty keńestiń jumysyna baılanysty kásibı pikir bildirip, keıbirin áli de tolyqtyrýdy usynyp, komısıa 200 jobany qaraǵan. Sonymen birge, komısıa músheleri qurylystyń jańa erejesin, abattandyrý, kólik saıasatyn, bas jospar, dızaın-kod sıaqty qujattardy ázirlep, olardy talqylaýǵa atsalysqan.
Komısıa turǵyndarmen tyǵyz jumys isteýge erekshe mán berip otyr. Atap aıtqanda, renovasıa jáne Ermensaı yqshamaýdanyn sýmen qamtamasyz etýge baılanysty ákimdikpen birlesip jumys toby quryldy.
Gúlmıra Baıǵabylovanyń aıtýyna qaraǵanda, kósheni jaryqtandyrýǵa baılanysty usynys qabyldanyp, qolǵa alynǵan. Avtonomdy qazandyqtardy baqylaý jáne elektr qýatyn kogenerasıalaý boıynsha jumystar jalǵasqan.
Komısıa sonymen birge ınklúzıvty jobalaý, nysandardy qujattaý, «kóliksiz aýla» konsepsıasyn damytý men qoǵamdyq kólikke otyrǵyzýdy kózdeıtin kópvektorly turaqqa baılanysty jobalardy da iske asyrǵan. Jaıaý júrginshilerge arnalǵan ótkeldi uıymdastyryp, samokattar men mopedterdiń qozǵalysyn retteıtin ereje shyǵarýǵa usynys ázirlendi.
«Búdjetti aldyn-ala talqylaý men jármeńkeden bastap kópirdiń astyndaǵy alańqaılarǵa arnalǵan «jyldam jeńý» dep atalatyn jobanyń iske qosylýy da – taǵy bir jańa bastamanyń biri bolyp otyr», - dedi komısıa tóraǵasy.
Komısıa áleýmettik mańyzy bar nysandarǵa, sonyń ishinde «Jaıly mektep» jobasy men TES-2-ge qatysty bastamalarǵa monıtorıń júrgizgen. Sonymen qatar, komısıa ókilderi qala ákimi men aýdan ákimderiniń turǵyndarmen ótkizgen kezdesýlerine turaqty túrde qatysyp otyrdy.