Almatyda 2022–2024 jylǵy III shaqyrylymdaǵy Qoǵamdyq keńestíń jūmysyn qorytyndylady, dep habarlaıdy aqshamnews.kz.
Būl jónínde óńírlík kommunıkatsıyalar qyzmetínde ótken baspasóz konferentsıyasynda «Aqparattyń resurs ortalyǵy» QQ dırektory, Almaty qalasynyń Qoǵamdyq keńesíníń tóraǵasy Altynaı Kóbeeva habarlady.
Onyń aıtuynsha, 3 jylda Qoǵamdyq keńes 40 jalpy otyrys ótkízíp, onda 61 ózektí máselení qaraǵan. Prezıdıumnyń 26 otyrysyn, komıssıyanyń aı saıynǵy bes kezdesuín ótkízgen. Sonyń arqasynda keńestíń qūramyna rezervtegí tízímde tūrǵan 15 adam qosylǵan jańadan.
«Bíz osy uaqyt aralyǵynda segíz audandyq ákímdíktíń, 76 memlekettík organnyń, mekemege qarasty 61 ūıymnyń esebín tyńdadyq. Onyń kóbíne ūsynys ázírlep, qazír solar júzege asyp jatyr»,- dedí Altynaı Kóbeeva. 2023 jylǵy sáuír aıynan 2025 jylǵy nauryz aıyna deıín segíz audanda 176 dıalog ótíp, oǵan 5292 adam qatysty. Olar – keńes múshelerí, ekspertter, memlekettík qyzmettíń ókílderí men qala tūrǵyndary.
Eksperttík top erekshe nazar audarǵan baǵyttyń bírí — sońǵy úsh jylda 85 qoǵamdyq monıtorıng ótkízílíp, 262 normatıvtík qūqyqtyq aktíge saraptama jasaldy.
Sonymen bírge ekologıya, densaulyq saqtau, ruhanı tárbıe, qoǵamdyq kólík, servıstík polıtsıyaǵa qatysty eń mańyzdy máseleler qaralǵan 6 qoǵamdyq tyńdau ūıymdastyrylyp, 28 dóńgelek ústel, qala jáne audan ákímderímen 140 kezdesu óttí.
«Qoǵamdyq keńes – qala tūrǵyndarynyń alańdatqan qoǵamdaǵy túıítkíldí árí ózektí máselelerdí sheshetín mańyzdy alańǵa aınaldy. Úsh jylda qala tūrǵyndary men zańdy tūlǵalardan 891 ótínísh túsíp, 795 ótíníshke naqty jauap beríldí»,- dep tolyqtyrdy Kóbeeva.
Basqarmalardyń byudjetíne monıtorıng jasaudan bastap áleumettík mańyzy bar máselelerge ūsynys engízuge deıíngí dúnıelerdí qamtyǵan 18 ís-shara ótkízíldí. Aqparattyq jūmys júrgízílíp, resmı saıt pen áleumettík jelíge 1366 maqala shyqty. Keńes múshelerí de ózíníń jeke paraǵynda jūmys barysyn kórsetíp otyrdy.
«Qoǵam men bılíktíń arasynda dáneker bolyp, baılanys ornatuda Qoǵamdyq keńestíń orny erekshe ekenín uaqyttyń ózí dáleldedí. Qalany qoldan kelgenshe almatylyqtarǵa qolaıly etíp, ízgílendíru úshín kez kelgen adamnyń aryz-shaǵymyn ayaqsyz qaldyrmauǵa barymyzdy salyp jatyrmyz», - dep túıíndedí Altynaı Kóbeeva.