Bul týraly Óńirlik komýnıkasıalar qyzmetiniń alańynda ótken baspasóz konferensıasynda keńes músheleri baıandady.
Spıkerler ár sala boıynsha atqarylǵan isterdi atap, almatylyqtardyń ómir sapasyn arttyrýǵa baǵyttalǵan bastamalar men usynystardy tanystyrdy, dep habarlaıdy aqshamnews.kz.
Qoǵamdyq damý, mádenıet, sport, din jáne jastar isi jónindegi komısıanyń tóraǵasy Marlen Rysbekov 2024 jyly 11 qoǵamdyq monıtorıń júrgizilgenin habarlady.
«Biz Almaty zoobaǵy, murajaılar, teatrlar, arhıvter men tarıhı ǵımarattardy aralap, olardyń jaǵdaıyna saraptama jasadyq. Anyqtalǵan problemalardy mádenıet jáne sport basqarmasymen birge sheshý joldaryn talqyladyq», — dedi Rysbekov.
Onyń aıtýynsha, komısıa Almaty ıpodromy, zoobaq, S. Muqanov pen Ǵ. Músirepov mýzeıleri sekildi mańyzdy nysandarǵa baryp, úsh kezeńnen turatyn monıtorıń júrgizgen. Qyrkúıek aıynda memlekettik organdar men sarapshylardyń qatysýymen dóńgelek ústel ótken.
Sport jáne jastar saıasaty da nazardan tys qalmady. Memlekettik baǵdarlama aıasynda jumys isteıtin sport klýbtarynyń jumysyna taldaý jasalyp, «Damý bala» jobasyna táýelsiz sarapshylar baǵa bergen. Jyl sońynda ata-analarmen, kásipkerlermen, depýtattarmen jáne aýdan ákimdikteriniń ókilderimen kezdesý uıymdastyrylǵan.
Ekonomıka, ınvestısıa, kásipkerlik jáne sıfrlandyrý jónindegi №4 komısıanyń tóraǵasy Nýrjan Jakýpov bul saladaǵy negizgi baǵyttar boıynsha monıtorıń júrgizilgenin málimdedi.
«Biz týrızmge arnalǵan aqparattyq pýnktter, shaǵyn jáne orta bıznes ókilderi, sıfrlyq platformalar men kvazımemlekettik uıymdardyń ashyqtyǵy boıynsha taldaý júrgizdik. Usynystardy sosyn memlekettik organdar men mınıstrlikterge joldadyq», — dedi Jakýpov.
Sonymen qatar, komısıa jyljymaly saýda nysandaryn damytý, áleýmettik kásipkerlikti qoldaý jáne sıntetıkalyq nashaqorlyqpen kúres taqyrybynda dóńgelek ústelder ótkizgen.
№5 komısıanyń múshesi Bogdan Djepka áleýmettik saıasat salasyndaǵy jumystar týraly baıandady. Komısıa jumyspen qamtý týraly zańǵa saraptama jasap, mektep asqanalarynyń qyzmetine monıtorıń júrgizip, ınklúzıvti ınfraqurylymdy damytýǵa atsalysqan.
«Biz jumyspen qamtý basqarmasymen birlesip, múgedektigi bar balalarǵa arnalǵan ınvataksı baǵdarlamasyn iske qostyq. 450 júrgizýshi olardy kólikke otyrǵyzyp-túsirýdi úırendi. Qazir shaǵym jaǵy azaıǵanymen, oqytýdy jalǵastyryp jatyrmyz», — dedi Djepka.
Sondaı-aq, balalardyń múgedektigin erte anyqtaý máselesine erekshe kóńil bólingen. Perzenthanalar men emhanalarda júrgizilgen monıtorıńtiń arqasynda ýaqytyly emdeý jáne otbasylyq qoldaý kórsetý múmkindigi artqan. Qoǵamdyq keńes qalalyq ınfraqurylymdy beıimdeý, qoǵamdyq kólik pen mekemelerdi qoljetimdi etý máselesin turaqty baqylaýda ustap otyr.
Jıyn sońynda spıkerler Qoǵamdyq keńestiń aldaǵy ýaqytta da qala turǵyndary men memlekettik organdar arasyndaǵy dıalog alańy bolyp qala beretinin atap ótti. Keńes almatylyqtardyń ózekti máselelerin kóterip, sheshimin tabýǵa úles qosýǵa nıetti.