QR Prezıdenttigine kandıdat Meıram Qajyken Mańǵystaý oblysynyń kásipodaq ókilderi jáne qoǵam qaıratkerlerimen kezdesti.
Alǵashynda úmitker óziniń saılaýaldy baǵdarlamasynyń negizgi baǵyttary týraly aıtyp, áleýmettik áriptestik ınstıtýtyn odan ári damytýdy qamtıtyn azamattyq qoǵam taqyrybyna tolyǵyraq toqtaldy.
Taraptar respýblıkalyq jáne salalyq kásipodaqtardyń jáı-kúıi týraly pikir almasty. Qazaqstannyń «damýshy elderdi eskere otyryp, eń tómengi jalaqyny belgileý týraly» 131 Halyqaralyq Eńbek Uıymynyń konvensıasyn qabyldaý qajettiligi talqylandy.
M. Qajyken saılaýshylarmen kezdesý kezinde osy qujatqa basa nazar aýdaratynyn atap ótti. Konvensıa bul - eń tómengi jalaqy deńgeıin (ETJ) anyqtaýda eskeriletin faktorlardy kózdeıdi. Esepteý kezinde eldegi jalpy jalaqy deńgeıin, ómir súrý qunyn, áleýmettik tólemderdi jáne basqalaryn eskere otyryp, jumysshylar men olardyń otbasylarynyń qajettilikteri qaralady.
«Konvensıada ETJ zań kúshine ıe ekendigi jáne onyń tómendemeıtini anyq aıtylǵan. Erejeni eskermegen jaǵdaıda qylmystyq nemese basqa sharalar qoldanylady. Bul ásirese jumys berýshiler eń tómengi jalaqydan da tómen aqy tóleıtin aımaqtarda óte mańyzdy», - dedi úmitker.
Kezdesýge qatysýshylar zeınetaqy aýdarymdary, jalaqy, jumysqa ornalasý taqyryptary men óńirdiń máselelerin talqylady.
Qazaqstan Prezıdentiniń kezekten tys saılaýy 20 qarashada ótedi.