Elimizde onlaın-kazıno jarnamalaǵan 34 bloger anyqtaldy, dep habarlaıdy aqshamnews.kz
Jyl basynan beri Qarjylyq monıtorıń agenttigi 34 blogerdiń onlaın-oıyndardy jarnamalaýǵa qatysy baryn anyqtady. Olardyń 11-i ákimshilik jaýapkershilikke tartyldy, al 23 kontent jasaýshyǵa qatysty materıaldar Mádenıet mınıstrligine shara qabyldaý úshin joldandy.
Kópshiligi zańdy júıeli túrde buzǵany belgili boldy. Máselen, hıp-hop oryndaýshy «Baller» (shyn aty – Shyńǵysqan Kópbaev) jyl basynan beri atalǵan bap boıynsha bes ret jaýapqa tartylǵan.
600 myńnan astam jazylýshysy bar mýzykant-bloger Rınat Shamshyraqqa qatysty da onlaın-kazıno jarnamalaǵany úshin ákimshilik is qozǵalǵan.
Bloger «Niko_nett» pen ınflúenser Qaısar Qamza da erekshe nazarda. Sońǵysy óziniń telegram-arnasynda zańsyz oıyndardy únemi nasıhattap, jalǵan jeńimpazdardyń vıdeolaryn jarıalap keledi.
Sol sıaqty, Naıl Turǵanov onlaın-kazıno jarnamasy úshin 8 mln teńgeden astam qarjy alǵan.
Al Nurǵazy Toqtarov (Nakonay Qarapaiym) áleýmettik jelilerinde azamattardy zańsyz oıyndarǵa tartý maqsatynda agressıvti naýqan júrgizip, jarnama úshin 15,8 mln teńge alyp, onyń jartysyna jýyǵyn sol platformalardyń ózinde oınap utylyp qalǵan.
Marıam Quljabaeva (oomariko) ınternet-kazınoda tirkelýge shaqyrǵan qarapaıym storısterin 350 myń teńgege baǵalaǵan.
Oǵan qosa, Zýhra Hakıeva, Dıana Halmetova, Ásem Aýbakırova, Arına Baıkova, Kúmisaı Aıymbetova jáne basqa da blogerlerdiń aty belgili.
Mıllıondaǵan tabysqa kenelgen blogerler aıyppuldaryn tólep, zańsyz áreketin qaıta jalǵastyryp júr. Osyǵan baılanysty QMA onlaın-kazıno jarnamasy úshin qylmystyq jaýapkershilik engizý bastamasyn kóterip otyr.