Almatydaǵy Ábilhan Qasteev atyndaǵy Memlekettik óner mýzeıinde aýqymdy jóndeý-qalpyna keltirý jumystary bastaldy. Bul týraly QR Mádenıet jáne aqparat mınıstri Aıda Balaeva málimdedi, dep habarlaıdy Aqshamnews.kz tilshisi.
Mınıstrdiń aıtýynsha, mádenı nysandardy jańǵyrtý men saqtaý baǵytyndaǵy memlekettik baǵdarlama aıasynda iske asyrylyp jatqan joba mýzeıdi zamanaýı talaptarǵa saı qaıta jabdyqtaýǵa baǵyttalǵan.
"Jańǵyrtý sheńberinde shatyrdy aýystyrý, zamanaýı klımattyq júıeler ornatý, parket jabyndysyn qalpyna keltirý jáne ózge de mańyzdy tehnıkalyq jetildirýler kózdelgen. Bul sharalar kelýshiler úshin barynsha qolaıly jaǵdaı jasap, óner týyndylaryn saqtaýdyń zamanaýı talaptaryn qamtamasyz etýge baǵyttalǵan" delingen mınıstr jazbasynda.
5 tamyzdan bastap mýzeı ýaqytsha jabyldy. Mundaı sheshim qundylyqtardy saqtaý men qurylys kezeńindegi qaýipsizdikti qamtamasyz etý úshin qabyldanǵan.
"Osy mańyzdy jobany júzege asyrýǵa qoldaý kórsetken Senim Qogamy qory men bas demeýshi "Samuryq-Qazyna" AQ-na shynaıy alǵysymyzdy bildiremiz. Jóndeý jumystaryn merdiger uıym – "Lucky Build Company" JSHS atqaryp jatyr" dep qosty Balaeva.
Barlyq jumys aıaqtalǵan soń, jańarǵan Qasteev mýzeıi qonaqtaryn jańa zamanǵa saı keńistikte, shabyt syılaıtyn atmosferada qarsy alatyn bolady.