RJQJ qutqarýshylary Aýǵanstandaǵy jer silkinisiniń zardaptaryn joıýǵa qalaı kómektesti?
Qazaqstandyq qutqarýshylar qazan aıynyń basynda joıqyn jer silkinisi bolǵan Aýǵanstannyń Gerat provınsıasyndaǵy gýmanıtarlyq mısıasyn aıaqtap, elge oraldy, dep habarlaıdy Almaty-akshamy.kz.
Bizdiń elimiz Aýǵanstan turǵyndaryna kómektesý úshin qutqarýshylaryn jibergen alǵashqylardyń biri boldy. Búgingi kún batyrlary issapar barysy týraly keńirek aıtyp berdi. Aıta keteıik, bul - respýblıkalyq jedel-qutqarý jasaǵynyń ókilderiniń ekinshi ret osyndaı jaǵdaıda kómekke barýy. Túrkıada bolǵan jer silkinisi kezinde de bizdiń qutqarýshylar birden oqıǵa ornyna attanǵan bolatyn.
Aýǵanstandaǵy qutqarý operasıasynyń qalaı ótkenin qutqarýshylar Almaty qalasynyń óńirlik komýnıkasıalar qyzmeti uıymdastyrǵan baspasóz konferensıasynda aıtyp berdi
TJM derekteri boıynsha, Almatydan mısıaǵa barlyǵy 45 adam barǵan, olardyń qatarynda qutqarýshylar, RJQJ kınologıa mamandary, QR TJM Apattar medısınasy ortalyǵynyń dárigerleri men feldsherleri attandy. Bul issaparda qutqarýshylarymen birge úıindiler arasynda úsh qyzmettik ıt jumys istedi.
«10 qazanda biz Gerat provınsıasyna jettik. Biz ózimizben birge tolyq jabdyqtalǵan Kamaz, gazel jáne ÝAZ aldyq. Halyqaralyq standarttarǵa saı, biz avtonomdy rejımde ómir súre alatyndaı qurǵaq as, sý qory men shatyr aldyq. Áýejaıǵa kelgennen keıin bizdi jergilikti bılik qarsy alyp, bizdi Naıbrofı eldi mekenine bóldi. Bul kúrdeli ýchaskelerdiń biri boldy, óıtkeni onda 700-den astam úı bolǵan jáne olardyń barlyǵy qıraǵan. Ol jerde shatyrlar tigilip, medısınalyq pýnkt ornatyldy», - dedi QR TJM Almaty qalasy boıynsha RJQJ basshysy, halyqaralyq deńgeıdegi qutqarýshy Vladımır Soı.
Qazaqstandyq qutqarýshylar kózben kórgenderin sıpattaı otyryp, Vladımır Soı bul kisilerdi tań qaldyrǵan jaıttarǵa da toqtaldy. Onyń aıtýynsha, bir qaraǵanda qum arasynan tabylmaı qalatyndaı kórinetin saban úıler kerisinshe júzdegen adamnyń panasyna aınalǵan. Qutqarýshylarǵa bul oryndarda arnaıy tehnıkanyń qoldanýdyń qajeti de bomaǵan, sebebi ol beton qurylystarǵa arnalǵan. Sondyqtan jasaq apattan opat bolǵandardyń denelerin qolmen shyǵaryp, aman qalǵandaryn izdedi.
«Biz mundaıdy birinshi ret kórdik, saý qalǵan birde-bir úı bolmady. Biz ózimizben birge alyp kelgen gıdravlıkalyq jáne pnevmatıkalyq apattyq-qutqarý quraldarynyń bizge paıdasy tımedi. Kúrekpen, qaıla jumys istedik, bári qolmen tyrmalandy», - dep jalǵastyrdy V.Soı.
11 qazanda qutqarýshylar 6,3 baldyq aftershokty sezgen. Jaǵdaıdyń kúrdeliligine qaramastan, qutqarýshylar ornalasqan oryndarynan 10 shaqyrym jerdegi Voıakı men Sıahabta qystaýlarynda qutqarý jumystaryn jalǵastyrdy. Bul jerde de eldi-mekenniń bári qırandy astynda qalǵan, tek zardap shekkender bolmaǵan, óıtkeni alǵashqy jer silkinisinen keıin jergilikti turǵyndar úılerin tastap, kóshege shatyrlarǵa kóshken. Onda qazaqstandyq qutqarýshylar zardap shekken 10 adamǵa kómek kórsetti, olardyń arasynda áıelder men balalar da boldy. Al kelesi kúni tańerteń olar bastapqyda kelgen ornyna oralyp, ol jerde 5 jasar balany úıindilerdiń astynan shyǵaryp alǵan.
İzdeý jumystaryn qubylmaly aýa-raıy da qıyndatty, kúndiz ystyq, keshke sýyq, tipti ólekselerdiń ıisiniń ózi keri áser etti, sebebi kóptegen mal qyrylǵan bolatyn. Itterge tek máıitterdi izdep qana qoıǵan joq, olar tiri adamdardy da izdeýge úıretilgen, biraq tórt aıaqtylar ózderine artylǵan mindeterin oıdaǵydaı atqardy, tynys almaı jatqandardy da tapty. Olar muny Túrkıada issaparda júrgende úırendi.
Sonymen qatar, bizdiń qutqarýshylar zardap shekkenderdi izdeý úshin taǵy 9 eldi mekendi aralady. Aýǵan turǵyndarynyń shatyrlaryn qulatyp ketetin shańdy daýyl da jumysty qıyndatty.
Qutqarýshylardyń ózderi de ózderimen birge alyp barǵan shatyrlarda turdy. Vladımır Soıdyń aıtýynsha, olar sheteldik issaparlarǵa barǵanda, olar sol elge eshqashan aýyrtpalyq salmaıdy, barlyǵyn ózderimen birge alyp júredi, kerisinshe, tipti zardap shekken provınsıalardyń turǵyndarymen sýlaryn bólisken. Aýǵanstandaǵy jaǵdaı turaqsyz bolǵandyqtan, qazaqstandyq qutqarýshylardy pıkaptarda qarýlanǵan kúzetpen júrdi. Biraq jergilikti turǵyndar jyly shyraı tanytyp, Qazaqstannan kelgen qutqarýshylarǵa jaqsy qaraǵan.
Aıta keteıik, Aýǵanstanda Irannan, Túrkıadan, Túrkimenstannan qutqarýshylar da jumys istegen.
QR TJM derekteri boıynsha Aýǵanstanda izdestirý-qutqarý jumystaryn júrgizý barysynda Qazaqstan qutqarýshylarynyń kúshimen 83 jergilikti turǵynǵa medısınalyq kómek kórsetildi, úılerdiń 211 fragmenti bólshekteldi, Naıbrofı eldi mekenindegi qıraǵan úılerdiń barlyq 700 ýchaskesi tekserildi.