Jyl saıyn 1 mamyr kúni atap ótetin Qazaqstan halqynyń birligi kúni qarsańynda, Astanada Qazaqstan halqy Assambleıasynyń XXXIV sesıasy bolyp ótti.
Almatynyń delegasıasy sesıanyń jumysyna belsene qatysyp, óńirlik komýnıkasıalar qyzmetiniń suqbat alańynda ol jaqtan qandaı áser alyp qaıtqandaryn aıtty, dep habarlaıdy aqshamnews.kz.
Almatydan sán-saltanaty kelisken – 64 adamnan turatyn delegasıa bardy. Aralarynda – etnomádenı ortalyqtyń, jastar men analar uıymynyń ókilderi men azamattyq bastama kóterip júrgen belsendiler de bolypty.
Delegasıa jastardyń damýy men turǵyndardyń az qamtylǵan bóligin qoldaýǵa arnalǵan birneshe joba usyndy onda. Ásirese Medeý aýdanynyń komúnıtı-ortalyǵyna erekshe yqylas bildirdi jıyndaǵylar. Qazir osy ortalyqta 200 adam oqyp, 1200-den astam adam jumysqa turyp, ártúrli qaýymdastyqtar men klýbtar da qurylǵan.
«Taza Qazaqstan», «Raqmet Jer-ana» sekildi ekologıalyq aksıalar, «Jastar Generation» deıtin halyqaralyq lager men «Bolashaqtyń top 50 mamandyǵy» degen bilim bastamasy da kóp qoldaýǵa ıe boldy osy sesıada. 2024 jyldyń basynan beri 9400 adamdy qamtyǵan «Jomart jan» ortalyǵynyń jumysy da eskerýsiz qalǵan joq.
Almatydaǵy QHA tóraǵasynyń orynbasary Vsevolod Lýkashevtiń aıtýynsha, osy jolǵy sesıa «Bir¬lik. Jasampazdyq. Órleý» degen atpen ótken. QHA-nyń 2025-2030 jyldarǵa arnalǵan damý konsepsıasyn ázirlep, ultaralyq tatýlyqty nyǵaıtatyn jumysty jan-jaqty kúsheıtip, «Eldesý jáne tatýlasý» jobasyn áli de aýqymdy ete túsý negizgi mindet bop qaldy.
«Birligi jarasqan el» ustanymyn mádenıet jáne óner arqyly júzege asyrý úshin Astana men Almatyda Aleksandr Pýshkınniń, Taras Shevchenkonyń, Feodor Dostoevskııdiń, Mıhaıl Sholohov mýzeıleriniń kórmesi ótpek. QHA-nyń 30 jyldyǵynda Almatyda Qazaqstandaǵy ulttardyń ónerine arnalǵan teatrlandyrylǵan festıvál da ótedi», — dedi V. Lýkashev.
Túrik etnomádenı ortalyǵynyń analar keńesiniń tóraǵasy Zýlfıa Hýseınovanyń aıtýynsha, jıynda kóterilgen taǵy bir mańyzdy másele - otbasylyq qundylyqtardy damytý bolypty.
«Bıyl otbasy ınstıtýtyn qoldaýǵa ǵana emes, jastardyń bastamashyldyǵyna, jastardy áleýmettik, etnomádenı jobalarǵa tartýǵa da nazar aýdardyq. Jastardy uıystyryp, ultaralyq baılanysty nyǵaıtýǵa baǵytalǵan bul baǵdarlamalardy erekshe atap ótkim keledi», — dedi tóraǵa.
«Qazaqstandaǵy uıǵyr jastary odaǵynyń» tóraǵasy Rýstam Qaıryev te óz kezeginde sesıanyń jumysynda qarapaıym mamandyqtardy qadirleýge, jastardyń mamandyq tańdaýyna kóp kóńil bólinip jatqanyn atap ótti.
«Qazir QQA-nyń jastar qanaty memlekettik mańyzy bar jobalardy júzege asyrýǵa atsalysyp jatyr. Sesıa barysynda prezıdentimiz Qasym-Jomart Toqaev jastardyń arasynda jumysshy mamandyqtardy bedeldi etýge kóp kóńil bólý kerektigin atap ótti. Beti jyltyraǵan adamdary ǵana emes, naǵyz jumystyń bel ortasynda júrgen dánekerleýshilerdi, qurylysshylardy, ekonomıkanyń ósýine atsalysyp júrgen adamdardy kóp kórsetý kerek. Naryqta bilikti jumysshylar jetispeı jatqanda, oqýshylar áli ekonomıs, qarjyger bolýdy armandap júr», — dedi.
Qazaqstan uıǵyrlarynyń respýblıkalyq mádenı ortalyǵyn basqaratyn Abdýlhalıl Dolqýntaı da birlik bolsa ǵana jetistikke jetetinimizdi aıtady.
«Prezıdentimiz Qasym-Jomart Toqaev óz sózinde jastar tárbıesine aqsaqaldardy tartýdyń mańyzyn atap ótti. Ár ult aqsaqaldary arqyly jastardy tárbıeleýge atsalysýy kerek. Olarǵa durys bilim berip, durys tárbıe berip, durys jolǵa salýymyz kerek. Biz Almatyda jastarmen kezdesip, oqý oryndarynda, uıymdarda ártúrli is-shara ótkizip jatyrmyz qazir. Almatyda aqsaqaldar keńesi men «Jomart jan» jobasy osy baǵytta jaqsy jumys istep jatyr», — dep atap ótti ol.
Sesıa barysynda kóterilgen osyndaı ózekti máselelerden soń, Almaty ana men balany qoldaýǵa baǵyttalǵan, QQA jastar klýbtarynyń jelisin ulǵaıtyp, jańadan ultaralyq yntymaqty arttyratyn birneshe qalalyq bastamany júzege asyrýdy josparlap otyr.