QR Premer-Mınıstriniń orynbasary Tamara Dúısenovanyń tóraǵalyǵymen ótken keńeste otandyq dári-dármek jáne vaksınamen qamtý máseleleri talqylandy.
Jıynǵa Densaýlyq saqtaý, Aýyl sharýashylyǵy mınıstrlikteriniń, «QazBioPharm» ulttyq holdıńiniń ókilderi qatysty. Bıyl Densaýlyq saqtaý mınıstrligi QazVac vaksınasynyń 50 myń dozasyna tapsyrys berýdi kózdep otyr.
«QazBioPharm» veterınarlyq baǵyttaǵy preparattardy da shyǵarady. Ony óndirý kólemi artpaq – Aýyl sharýashylyǵy mınıstrligi ulttyq holdıńten veterınarlyq dári-dármekter men dıagnostıkýmdardyń 25,8 mln dozasyn alýdy josparlap otyr.
Óz kezeginde «QazBioPharm» basshysy Erǵalı Ábdiraıymov memlekettik organdarmen atalǵan ónimdi óndirýge jáne jetkizýge uzaqmerzimdi kelisim-sharttardy bekitýge nıet bildirdi. Atalǵan másele tıisti memlekettik organdarmen birlese qarastyrylatyn bolady.
«Otandyq óndirýshini qoldaý sharalarynyń mańyzy zor. Alaıda, bul rette usynylatyn preparattar sapasyna basa mán berilgeni jón. Ol úshin «QazBioPharm» ulttyq holdıńi basshylyǵy tikeleı jaýapty. Dári-dármekterdi óndirý jáne jetkizý merzimi boıynsha bekitilgen kesteni qatań saqtaý qajet», — dep atap ótti Tamara Dúısenova.