The Lancet jýrnalynda «QazVac» vaksınasy týraly maqala jarıalandy. Bul týraly Bilim jáne ǵylym mınıstri Asqat Aımaǵambetov jelide jazdy, dep habarlaıdy Almaty-akshamy.kz.
«EClinicalMedicine published by The Lancet jýrnaly otandyq «QazVac» vaksınasyn klınıkalyq zertteýdiń 1-2 fazasynyń nátıjeleri týraly maqalany qabyldap, elektrondyq nusqasyn basyp shyǵardy. Bıologıalyq qaýipsizdik problemalarynyń ǵylymı-zertteý ınstıtýtynyń ǵalymdaryn maqalanyń jarıalanýymen quttyqtaımyn!» - dedi mınıstr Asqat Aımaǵambetov.
Eske salsaq, 2020 jyldyń naýryz aıynda elimizde koronavırýs indetine baılanysty qatań karantındik sharalar qabyldandy.Memleket basshysy Qasym-Jomart Toqaev elimizdiń Bıologıalyq qaýipsizdik máseleleri jónindegi ǵylymı-zertteý ınstıtýtynyń ǵalymdary aldyna vırýsqa qarsy vaksınany shuǵyl ázirleý tapsyrmasyn júktedi. Búginde otandyq ǵalymdarymyz qysqa ǵana ýaqyttyń ishinde daıyndaǵan qazaqstandyq «QazVac» vaksınasy adamdarǵa egilip jatqany belgili.
QazVac vaksınasy - QR Bilim jáne ǵylym mınıstrliginiń Bıologıalyq qaýipsizdik máseleleri jónindegi ǵylymı-zertteý ınstıtýty ázirlegen COVID-19-ǵa qarsy belsendiligi joıylǵan vaksına. Inaktıvtendirilgen vaksına dástúrli jáne tıimdi bolyp sanalady, ony daıyndaý tehnologıasy kúrdeli emes ári vaksınalardyń basqa túrlerine qaraǵanda qaýipsiz. Sondyqtan qazaqstandyq ǵalymdar ınaktıvtendirilgen vaksına jasaý týraly sheshim qabyldady.
Jaqynda Bıologıalyq qaýipsizdik máseleleri ǵylymı-zertteý ınstıtýtynyń bas dırektory Kúnsulý Zákarıa QazVac vaksınasynyń tıimdiligi týraly pikir bildirdi. Maman QazVac vaksınasyna jasalǵan synaqtyń III fazasy ekpeniń tıimdiligin kórsetkenin aıtty.