Almaty oblysynda Táýelsizdiktiń 30 jyldyǵyna oraı túrli shara ótkizilip keledi. Solardyń biri retinde bolashaǵyn ǵylymmen baılanystyratyn jas daryndardy qoldaý maqsatynda uıymdastyrylǵan «Jas ǵalym» ǵylymı-ınnovasıalyq jobalar baıqaýyn aıtýǵa bolady, dep habarlaıdy Almaty-akshamy.kz Aikyn.kz saıtyna silteme jasap.
Syndarly synaqqa qatysqan 30-dan astam jas ǵalym qazylar alqasynyń talqysyna ózderiniń túrli saladaǵy ǵylymı eńbegin usyndy. Olardy jasyl energetıkany damytý, bilim salasyna ınovasıa engizý, múmkindigi shekteýli jandardyń qoǵamǵa beıimdelýin jeńildetý jáne basqa da baǵyttar qyzyqtyrady eken. Baıqaýda top jarǵan jeńimpazdardy oblys ákiminiń orynbasary Arslan Dándibaev quttyqtap, marapattady.
Almaty oblystyq Jastar saıasaty máseleleri jónindegi basqarmasy ma-mandarynyń aıtýyna qaraǵanda, «Jas ǵalym» ǵylymı-ınnovasıalyq baıqaýy óńirdegi bolashaǵyn ǵylymmen baılanystyratyn talantty jastardyń bastamalaryn qoldaý men olardyń ǵylymı áleýetin arttyrýdy maqsat etedi.
Erteńgi el ǵylymynyń kósegesin kógertetin jastardyń arasyndaǵy baıqaýda 8 jas dara shyǵyp, olar 300 myńnan 1 mln teńgege deıin aqshalaı syılyqtarmen marapattaldy.
Qatarlastarynan oza shapqan Tımýr Raqysbaev «Mektep jasyna deıingi balalarǵa arnalǵan Zerdeli bala oqytý mobıldi qosymshasy» jobasyn báıgege qosyp, bas júldege ıe bolsa, Súleımen Demırel atyndaǵy ýnıversıtettiń kompúter ǵylymdary mamandyǵy boıynsha PhD doktorlyǵy boıynsha bilim alýshy Aımóldir Aldabergenniń ınklúzıvti bilim berý uıymdarynyń jumysyn jeńildetýge arnalǵan jobasy birinshi orynnan kórindi.
Aımóldir Aldabergen dısleksıasy bar balalarǵa arnalǵan jasandy ın-tellektke negizdelgen anımasıalyq generator algorıtmin qurý týraly jobaǵa kirisý jaıyndaǵy oı alǵash doktorantýrada oqı bastaǵanda kelgenin aıtady.
– Qazaqstanda dısleksıasy bar balalardy tárbıeleıtin 19 mektep bar. Jobaǵa kiriser aldynda sol mekteptermen baılanys ornatyp, sala mamandarynyń oı-pikirin tyńdadym. Olar mundaı jobanyń qajet ekenin aıtty. Qazir pedagogter balalarǵa mátindi sýretter arqyly uǵyndyrý úshin ony plasılınnen jasap kórsetedi. Bul edáýir ýaqytty alady jáne shyǵyny kóp. Al meniń jobamda mátin boıynsha sýretterdi anımasıa arqyly jyldam kórsetýge múmkindik bar, – deıdi jas ǵalym.
Inklúzıvti bilim berýdi damytýǵa qosylǵan eleýli úles deýge turatyn bul jobany bilim júıesine engizse, tehnologıalyq jańalyq salanyń júgin edáýir jeńildetpek.
Sol sıaqty «Qazaqstannyń 100 jańa esimi» jobasynyń jeńimpazy Damır Nurkejanov Future-IT robototehnıka mektebi, Taldyqorǵan joǵary polıtehnıkalyq kolejiniń stýdenti Jiger Berliǵoja Eko Green, S.Asfendıarov atyndaǵy Qazaq ulttyq medısına ýnıversıtetiniń stýdenti Gúlim Serǵaly «Múmkindik» (Opportunities), S.Demırel atyndaǵy ýnıversıtetinen Qamar Begaıym «Qazaqstannyń JOO-da oqýǵa arnalǵan granttardy taldaý», İ.Jansúgirov ýnıversıtetiniń janyndaǵy kolej stýdenti Sapar Sultan «Energıa óndiretin ınovasıalyq taqtaısha», Iýlıa Lım «Jastar men múmkindigi shekteýli jandarǵa arnalǵan «Potensıal» ýaqyt klýby» jobalarymen úzdikter qatarynan oryn aldy.