Ál-Farabı atyndaǵy Qazaq ulttyq ýnıversıtetiniń ǵalymdary vakýmdyq synama alý qondyrǵysyn qurastyryp shyǵardy. Qurylǵy sý úlgilerin alýǵa jáne sýdaǵy organıkalyq lastaǵyshtardy anyqtaýǵa arnalǵan, dep habarlaıdy almaty-akshamy.kz Ál-Farabı atyndaǵy QazUÝ-dyń Baspasóz qyzmetine silteme jasap.
«Qazaqstanda bul alǵash ret. Atalǵan qondyrǵy 300-ge jýyq synama alýǵa múmkindik beredi. Germanıa, AQSH jáne basqa memleketterde bul qondyrǵynyń analogtary bar. Biraq olar elektr togy arqyly jumys isteıdi. Al bizdiń ónim energıa qýatynsyz jáne tabıǵı aımaqtarǵa qaramastan, jumys isteı beredi. Bul sý synamalaryn alý jumysyn áldeqaıda jeńildetedi», – dedi QazUÝ ǵalymy.
Atalǵan qondyrǵyny oqý ordasynyń ǵalymdary Syrdarıadaǵy sý sapasyn zertteýge jáne anyqtaý jumystaryna qoldanǵan. Nátıjesinde ózen sýynyń quramynan hlororganıkalyq pestısıdter, fýngısıdter jáne gerbısıdter anyqtalǵan.
Búgingi tańda ınovasıalyq jobaǵa patent alý jumystary júrip jatyr. Synama alýdyń prototıpi AQSH-ta synalýda. Testileýden sátti ótkennen keıin ýnıversıtet ǵalymdary jobany komersıalandyrý maqsatynda qondyrǵyny naryqqa shyǵarýdy kózdep otyr.