Ál-Farabı atyndaǵy Qazaq ulttyq ýnıversıtetiniń ǵalymdary qaterli isikke qarsy qoldanylatyn dárilik preparattardy ázirleý tásilderin jetildirdi.
Ýnıversıtet mamandary İle-Balqash óńirinde ósetin burshaqtústi túıetaban ósimdigin zerttep, onyń qaterli isik aýrýyna qarsy belsendiligin anyqtady, dep habarlaıdy aqshamnews.kz Oqý-aǵartý
Burshaqtústi túıetaban erteden halyq medısınasynda keńinen qoldanylǵan. Degenmen atalǵan ósimdik ǵylymı turǵyda tolyq zerttelmegen. QazUÝ ǵalymdary alǵash ret onyń quramyndaǵy fıtohımıalyq jáne bıologıalyq belsendi zattardy anyqtaýǵa baǵyttalǵan aýqymdy zertteý jumystaryn júrgizdi. Zertteýshilerdiń aıtýynsha, bul joba aldaǵy ýaqytta otandyq farmasevtıkany damytýǵa septigin tıgizbek.
«Joba nátıjesinde burshaqtústi túıetaban ósimdiginiń bıologıalyq belsendiligi joǵary ekeni anyqtaldy. Ósimdik syǵyndylary antıoksıdanttyq, antımıkrobtyq jáne sıtoýyttylyq qasıetterimen erekshelendi. Máselen, etanol syǵyndysy kúshti antıoksıdanttyq belsendilik kórsetti, al etıl asetaty syǵyndysy bakterıalarǵa qarsy tıimdilik tanytty. Sondaı-aq ósimdiktiń belgili bir syǵyndylary leıkemıa jasýshalaryna qarsy tura alatyny dáleldendi. Muny bolashaqta qaterli isik aýrýyna qarsy daıyndalatyn dárilerge paıdalanýǵa bolady», – deıdi QazUÝ-dyń aǵa oqytýshysy, doktorant Gúlzat Qaıranova.
Ǵylymı joba boıynsha qaýymdastyrylǵan profesor Ásem Mamýrova, PhD doktor, Túrkıa profesory Ahmet Beıatly jáne QazUÝ doktoranty Gúlzat Qaıranova jumys isteýde. Bolashaqta mamandar patent alýdy jáne joǵary reıtıńtik ǵylymı jýrnaldarǵa maqala daıyndaýdy josparlap otyr.
